Ахсынньы 11 күнүгэр оскуолабытыгар “Саарыннар суолларынан – (Мой путь)” бырагыраамма чэрчитинэн аан бастакытын “Герой оскуолата” диэн улуустааҕы патриотическай форум буолан ааста. Бу форумҥа кэнчээри ыччаты иитэр үлэ эйгэтигэр тирэх буолар педагогтар, наставниктар, салайааччылар кыттыыны ыллылар.
Тэрээһин кыттыылаахтарын нэһилиэкпит баһылыгын солбуйааччыта Альбина Николаевна Захарова эҕэрдэлээн тыл эттэ. Улууспут үөрэҕин управлениетын начальнигын солбуйааччыта Филипп Александрович Стручков форум Аҕа дойду Улуу сэриитигэр сахалартан бастакы Сэбиэскэй Сойуус Геройа Федор Кузьмич Попов төрөөбүт нэһилиэгэр ыытыллара улахан суолталааҕын бэлиэтээтэ. “Биһиги биир дойдулаахтарбытын, Геройдарбытын ааҕа бэйэлэрин билиэхтээхпит таһынан кинилэри холобур оҥостоммут үчүгэй олоҕу олоруохтаахпыт”, – диэн эттэ.
Ф.К. Попов аатынан Баатара орто оксуолатын дириэктэрин эбээһинэһин толорооччу Анна Петровна Жиркова: “Баатараҕа кадетскай интэринээт 2005 сыллаахха тэриллибитэ. Быйыл 20 сылбытын бэлиэтээтибит. Бу кэм устата 248 уол үөрэнэн ааспыта. Федор Попов аатын сүгэр кадетскай интернат 20 сыл устата 11 выпуһу иитэн таһаарда. Кадетскай кылааһы бүтэрбит оҕолорбутуттан 24 уолбут анал байыаннай дьайыы кыттыылаахтара буолаллар. 9 уолбут тыыннарын толук ууран, эдэркээн саастарыгар биһиги кэккэбититтэн туораатылар…” – диэн форум кыттыылаахтарыгар иһитиннэрдэ.
“Бастыҥнар хамсааһыннара” региональнай отделение бэрэссэдээтэлин солбуйааччыта Александр Николаевич Кузьмин “Юнармия” Саха сиринээҕи отделениета Сэбиэскэй Сойуус Геройа Федор Кузьмич Попов аатын сүгэрин туһунан киэн тутта эттэ.
“Оҕо саас сирдьиттэрэ” регионнааҕы тирэх киин салайааччыта Нюргуяна Владимировна Макарова 5-11 кылаастарга анаан оҥоһулла сылдьар “Саарыннар суолларынан (Мой путь)» иитии программатыгар 9 саарыннар кэккэлэригэр сахалартан бастакы Сэбиэскэй Сойуус Геройа Федор Кузьмич Попов уонна сахалартан бастакы Арассыыйа наукатын акдемиятын академига, техническэй наука доктора Владимир Петрович Ларионов киирэ сылдьалларын туһунан билиһиннэрдэ.
Нюргуяна Владимировна соторутааҕыта күн сирин көрбүт “Именем твоим, Герой” диэн кинигэни оскуолабытыгар бэлэхтээтэ.
– Российскай Федерация үөрэҕэриитин министиэристибэтэ, “Росдетцентр” федеральнай тэрилтэ “Навигаторы детства” бырайыакка үлэлиир дириэктэри иитэр үлэҕэ сүбэһиттэр быһаччы көмөлөрүнэн бу кинигэ бэчээттэнэн таҕыста. Манна Арассыыйа 89 регионуттан 89 Герой историята түмүллэн киирдэ. Инньэ гынан бу кинигэ Арассыыйа 89 регионугар тарҕанна. Биһиги өрөспүүбүлүкэбититтэн бастакы Геройбут Федор Кузьмич Попов туһунан киирдэ. Онон билигин 89 региоҥҥа кини туһунан билэ—көрө, ааҕа сылдьаллар. Бу кини аатын үйэтитиигэ биһиги сэмэй кылааппыт буолар, – диэн кэпсээтэ.
“Именем твоим, Герой” кинигэҕэ анаан Федор Кузьмич туһунан матырыйаалы хомуйууга Баатара орто оскуолатын дириэктэр сүбэһитэ Сайыына Николаевна Свинобоева, оскуола салалтата, ону тэҥэ улуустааҕы “Мэҥэ кэскилэ” патриотическай иитиигэ тирэх киин салайааччыта Марианна Дмитриевна Монастырева үлэлэспиттэр. Онон Нюргуяна Владимировна Баатара оскуолатын коллективыгар, чуолаан дириэктэр сүбэһитигэр Сайыына Николаевна Свинобоеваҕа махталын биллэрдэ.
Форум үлэтигэр Ф. К. Попов аатынан Дьокуускайдааҕы 20 №-дээх оскуола учууталлара кыттыыны ыллылар. Алын кылаас учуутала, иитии үлэтигэр дириэктэр сүбэһитэ Валентина Валентиновна Пахомова: “Баатара уонна Дьокуускай куорат 20 №-дээх оскуолаларын Федор Кузьмич Попов аата ситимниир. Онон Федор Кузьмич дойдутугар кэлэр биһиэхэ куруук долгутуулаах уонна эппиэтинэстээх. Үчүгэй форум буолан ааста. Элбэх интириэһинэй дьону кытта билистим, элбэҕи биллим. Проектыыр үлэҕэ кыттаммын, үлэбэр саҥа идеялар киирдилэр”, – диэн санаатын үллэһиннэ.
Патриотическай форум кыттааччылара “Саха Өрөспүүбүлүкэтин чулуу дьонноро” диэн бырайыактыыр үлэ сессиятыгар, оскуола үөрэнээччилэрэ “Бастыҥнар хамсааһыннара” региональнай отделение бэрэссэдээтэлин солбуйааччыта А.Н. Кузьмины кытта көрсүһүүгэ кыттыыны ыллылар, “Саарыннар суолларынан (Мой путь)» иитии программатын тула санаа атастастылар, Баатара түмэлин көрдүлэр.
Форум кадеттар вальстарынан түмүктэннэ.
Маша НИКИФОРОВА, XI кылаас,
Ф.К. Попов аатынан Баатара орто оскуолата, Мэҥэ Хаҥалас
Арсений Жирков хаартыскалара, VII кылаас