Сэтинньи 19 күнүгэр нэһилиэкпитигэр Екатерина Афанасьевна Захарова-Саха Күөрэгэйэ аатынан култуура киинигэр Россияҕа Дьиэ кэргэн, Саха өрөспүүбүлүкэтигэр Оҕо саас сылыгар оскуолабыт учуутала Василиса Валерьевна Неустроева толкуйдааһынынан, V кылаастар көмөлөрүнэн «Ыллыыр ыллык» диэн ырыа күрэҕэ буолан ааста.
Киирии чааһыгар «Эбэм лэппиэскэтэ» диэн бэйэм айбыт хоһооммун, V кылаас ырыаһыт кыргыттара ырыа бэлэх ууннубут. Салгыы нэһилиэкпит элбэх оҕолоох, Герой-ийэлэрбитин ахтан-санаан слайда көрдөрдүлэр, аҕам саастаахтар, ыалдьыттар, санааларын иһиттибит.
Ефросинья Васильевна Новикова, элбэх оҕолоох ийэ:
– Герой-ийэлэрбитин санаан, слайда олус үчүгэйдик оҥоһуллубут. Василиса Валерьевна ыытар үлэтэ оскуолаҕа да, нэһилиэккэ да куруук ситиһиилээхтик бара турарын көрөн астынабыт. Бүгүҥҥү тэрээһин биһиэхэ, элбэх оҕолоох ийэлэргэ олус үөрүүлээх. Үүнэр көлүөнэ кинилэри олохторугар холобур оҥостон улааталлара наадалаах. Эдэр ийэлэргэ элбэх оҕолонон, нэһилиэкпит дьонун ахсаанын элбэтэргитигэр баҕарабын.
Дария Владимировна Захарова, оскуола дириэктэрин солбуйааччыта:
– Нэһилиэкпит элбэх оҕолоох ийэлэрин кэлэн иһэр Россия ийэлэрин күннэринэн эҕэрдэлиибин. Эһиэхэ доруобуйаны, оҕолоргут, сиэттэргит мичээрдэринэн уһуннук дьоллоохтук олороргутугар баҕарабын.
Бүгүҥҥү тэрээһининэн сиэттэрэн, олохтоох дьаһалтаҕа Герой-ийэлэр бюстарын оҥороргут буоллар диэн этиэхпин баҕарабын. Нэһилиэккэ дириҥ суолталаах история хаалыа этэ.
Кинилэр оҕолоро, сиэттэрэ харчынан кыттыһан күүс-көмө буолар кыахтаахтар. Кэлэр күлүөнэ ыччаттар билиэхтэрэ, үөрэтиэхтэрэ этэ диэммин бэйэм санаабын этэбин. Бүгүҥҥү бэһис кылаастар тэрээһиннэрэ олус үчүгэйдик ааста. Өссө кэлэр тэрээһиннэргэ көхтөөхтүк кэлэн кыттыыны ыларгытыгар баҕарабын.
***
Ырыа күрэҕин кыттааччыларын нэһилиэк баһылыга Прокопий Петрович Бубякин, Герой-ийэ Туяра Петровна Устинова, култуура киинин уус-уран салайааччыта Игорь Иванович Болтунов састааптаах дьүүллүүр сүбэ сыаналаата.
Күрэх Гран-при кыайыылаахтарынан Ньургуяна, Сахая Павловна Устиновалар буоллулар уонна «Амма кытыла» базаҕа сынньанар путевка сертификатын бэлэх туттулар.
Бастакы миэстэни ылбыт Аюна Ноговицына ийэтинээн Ирина Ивановналыын сертификатынан, бирииһинэн, онтон Алгыстаан Николаев ийэтинээн Сардана Валентиновналыын Прасковья Николаевна Новикова оҕолоро, сиэттэрэ олохтообут харчынан бирииһинэн наҕараадаланнылар.
Иккис миэстэни Алиса Соловьева эбэтинээн Софья Егоровналыын Герой-ийэ Тамара Петровна Петрова оҕолоро, сиэттэрэ олохтообут харчынан бирииһинэн, Анжелина Ноговицына эбэтинээн Анжелика Александровналыын харчынан бирииһинэн уонна бэлэхтэринэн наҕараадаланнылар.
Гран-при аатын ылбыт Ньургуяна Устинова: «Бүгүн оскуолабыт иһинэн биһиги 5-с кылаас коллектива, учууталбыт Василиса Валерьевна салайыытынан «Ыллыыр ыллык» ырыа күрэҕин тэрийдибит. Күрэх ирдэбилинэн, оҕо ийэтинээн, эбэтинээн ыллыахтаах диэн. Күрэххэ барыта биэс паара кытынныбыт. Мин кылааһым аатыттан ийэбинээн Сахая Павловналыын ыллаатыбыт. Ырыабыт билиҥҥи хит-ырыа «Дарите женщинам цветы» диэн. Ийэбинээн ыллыырбытын олус сөбүлүүбүт.
Ийэм: «Бэйэбитигэр барсар, судургутук ылланар уонна дьон сөбүлээн истэр ырыатын ыллыахха», – диэбитэ. Ийэбэр итэҕэйэр буоламмын тута сөбүлэспитим. Кини эппитэ куруук сөп буолааччы. Түгэнинэн туһанан, күндү ийэбин Сахая Павловнаны уонна эбэлэрбин Марианна Егоровнаны, Лолита Николаевнаны кэлэн иһэр Россия Ийэлэрин күннэринэн эҕэрдэлиибин», – диэн санаатын үллэһиннэ.
Бүгүҥҥү күрэх туһунан Софья Егоровна Соловьеваттан ыйыттым.
– «Ыллыыр ыллык» диэн ырыа күрэҕэр сиэмминээн Алисалыын «Мааны мастар» ырыаны ыллаатыбыт. Бастакы сырыыга үчүгэй диэн үөрэ санаатым. Бүгүҥҥү тэрээһини оҥорбут 5-с кылаастарга, салайааччыларыгар Василиса Валерьевнаҕа махтанабыт. Бүгүн Герой-ийэлэри ахтан-санаан ааспыттара олус үөрүүлээх. Ийэбин көрөммүн долгуйан уйадыйан ыллым, – диэн Софья Егоровна санаатын үллэһиннэ.
Түмүккэ, V кылаастар салайааччылара Василиса Валерьевна Неустроева бириистэри туруорбут, харчынан көмөлөспүт дьоҥҥо Махтал суруктары туттарда уонна ырыаһыт ийэлэр ырыалара түмүллүбүт, куйаар куодунан киирэн көстөр видеолаах ырыанньык буклеттары ыалдьыттарга бэлэх ууннулар.
Эрчим НИКОЛАЕВ, IX кылаас,
В.М. Новиков-Күннүк Уурастыырап аатынан Эмис орто оскуолата, Амма