Олунньу 27-28 күннэригэр Хадаар нэһилиэгэр ыытыллыбыт «Развитие моей малой Родины» (РММР) стратегическай оонньууга кыттыыны ылбыппыт. Нэһилиэк тэрилтэлэрин, бааһынай хаһаайыстыбаларын сырдаппыппыт уонна бу нэһилиэк туох бородууксуйаны оҥорон таһаарыан сөбүй диэн бырайыак оҥорбуппут.
Хадаар нэһилиэгэ 9 Герой-Ийэтинэн биллэр: Елена Васильевна Лукина, Вера Семеновна Давыдова, Александра Николаевна Анисимова, Февронья Ивановна Пермякова, Елизавета Афанасьевна Андросова, Светлана Николаевна Михайлова, Евдокия Романовна Давыдова, Евдокия Иннокентьевна Хоютанова, Мотрена Романовна Охлопкова. Онтон биһиги Тандабытыгар 13 Герой-Ийэ олорон ааспыта. Онон Герой-Ийэлэр туһунан биһиэхэ олус чугас уонна интэриэһинэй буолла. Кулууп таһыгар Герой-Ийэлэргэ аналлаах сквер баарын астына көрдүбүт.
Хадаар нэһилиэгин баһылыга Афанасий Афанасьевич Степанов юнкордары кытта көрсүһүүгэ ити туһунан бэлиэтээн эттэ: «Хадаары Хадаар дэппит дьоммут Герой-Ийэлэрбит буолаллар. Тоҕус Герой-Ийэ 99 оҕону төрөтөн, билигин кинилэр сыдьааннара тэнийэн, аан дойдуга тиийэ тарҕанан олороллор. Нэһилиэкпитигэр Лукиннар, Давыдовтар, Ксенофонтовтар, Андросовтар диэн сис араспаанньалар элбэхтэр. Кинилэр бары тоҕус Герой-Ийэ удьуордара буолаллар. Урут даҕаны, билигин даҕаны элбэх оҕолонуу – дойдубут сүрүн хайысхата. Бүгүҥҥү күҥҥэ Хадаарга 27 элбэх оҕолоох ыал олорор. Арассыыйа, өрөспүүбүлүкэ салалтата оҥорор көмөтүн таһынан, улуус 4-с оҕоҕо борооску биэрэр. 2024 сыллаахха бэйэбит уолбут, үөрэммит оскуолатыгар төннөн кэлэн сүүрүү тренеринэн үлэлии сылдьар Реворий Михайлович Елисеев үс игирэ оҕоломмута».
Егор Афанасьевич Борисов аатынан архыып-бибилэтиэкэ филиалыгар анал муннук баар. Онно Герой-Ийэлэр туһунан араас сылларга тахсыбыт кинигэлэр, матырыйааллар түмүллэн тураллар.
Ити курдук Хадаарга Герой-Ийэлэр ааттарын үрдүктүк туталлар.
Снежанна ГОТОВЦЕВА, IX кылаас,
М.Н. Готовцев аатынан Танда орто оскуолата, Уус Алдан