Томпо улууһун Үөгэн сүрүн оскуолатын 4 кылааһын үөрэнээччитэ Слепцов Савелий Учуутал күнүгэр бэйэтин уһуйааччытын туһунан санаатын үллэһиннэ:
«Мин таптыыр учууталым Фекла Ивановна Еремеева. Кини миигин түөрт сыл устата билии суолугар сирдээн, үөрэтэн кэллэ. Фекла Ивановна дириҥ билиилээх учуутал.
Биһигини алыптаах музыка эйгэтигэр, уустук ахсаан суотугар, төрөөбүт төрүт тыл умсулҕаныгар үөрэтэр, такайар. Ону таһынан араас таһымнаах дакылааттарга, олимпиадаларга кытыннарар, ол иһин кэккэ элбэх ситиһиилэрдээхпин.
Үчүгэй үлэтин иһин кини Саха сирин Ил Дарханын Гранынан бэлиэтэммитэ. Өссө кини билигин Үөгэн сүрүн оскуолатыгар учууталларга сүбэһитинэн үлэлиир. Мин 2023 сыллаахха “Ступеньки к творчеству» өрөспүүбүлүкэтээҕи НПК-ҕа Дьокуускай куоракка кыттан 3-с степеннээх дипломҥа тиксэн элбэҕи көрөн-истэн кэлбитим.
Онон учууталбар махталым улахан! Учууталбын идэлээх бырааһынньыгынан итиитик-истинник эҕэрдэлиибин! Дьоллоох, доруобай буол!»
Слепцов Савелий
Үөгэн сүрүн оскуолатын
IV кылааһын үөрэнээччитэ.