Fntastic көмпүүтэр оонньуутун студията уонна MyTona хампаанньа саҥа The Day Before көмпүүтэр оонньуутун таһааралларын туһунан биллэрдилэр. Бу оонньуу тахсарын туһунан NME, IGN, Gamekult, TechRaptor, Looper курдук омук дойдуларын биллиилээх сурунааллара, сайтара суруйдулар. Онон сибээстээн Fntastic хампаанньаны төрүттээбит Эдуард, Айсен Готовцевтары билиһиннэрэбит. 
Эдуард: «Интервью биэрэрбин сөбүлээбэппин гынан баран, оҕолор мотивацияланныннар, урут «Кэскили», “Чуораанчыгы” ааҕар этим»,- диэн ыйытыыларбытыгар хоруйдаата.
The Day Before — ММО-оонньуу, тыыннаах хаалар туһугар охсуһуу симулятора (многопользовательский шутер с элементами выживания и открытым миром). Пандемия кэннинээҕи Америкаҕа өлөр өлүүгэ тиэрдэр вируска хаптарбыт, ол гынан баран тыыннаах хаалбыт дьон аһыыр ас, саа сэбин, миинэр массыына туһуттан бэйэ-бэйэлэрин кыдыйсаллар. 
Оонньооччу бэйэтин оонньуур персонаһын “оҥорон” таһаарыахтаах, тыыннаах хаалар туһугар бэйэтин хааччыныахтаах. Локациялары чинчийэргэ атын «оонньооччуларга” кэтиллэ түһэн, кинилэри кытта киирсиэн сөп. Куттала суох зоналар эмиэ бааллар, манна сынньаныахха уонна араас малы-салы атыылыахха-атыылаһыахха сөп. Стелс (көстүбэт)-эрэсиим эмиэ баар. Оонньуу дьоруойун тыыннаах хаалар усулуобуйатынан кыаҕа-күүһэ (энергия), таһырдьааҥы температура уонна дьоруой этин-хаанын туруга буолаллар. Оонньуу туһунан Steam-ҥа билсиэххэ сөп. YouTube көрөөччүлэрэ бу оонньууну The Division и The Last of Us курдук аатырбыт оонньууларга тэҥнээбиттэр.
Fntastic –2015 сыллаахха Дьокуускай куоракка тэриллибит көмпүүтэр оонньууларын оҥорон таһаарар gamegev хампаанньа. Ыраахтан олорор үлэлииргэ аналлаах Continent App сыһыарыыны туһанар. Онон Ньурба, Уус-Алдан улуустарын, Уһук Илин уонна Сибиир куораттарын разработчиктара Интернет нөҥүө үлэлииллэр.
Wild Eight уонна Radiant One курдук ситиһиилээх оонньуулары айбыттара. Radiant One мобильнай оонньуу App Store Интернет-маҕаһыыҥҥа уонна Metacritic сайтка үчүгэй сыанабыллаах.
Fntstic Дьокуускайдааҕы ИТ парк резиденэ, ИТ сайдыытын ассоциациятын чилиэнэ буолар. «Яндекс — лицей» Дьокуускайга тэриллэригэр көмө оҥорбута. Эдуард ХИФУ иһинэн тэриллибит «Орех» бизнес-инкубаторы салайа сылдьыбыта.
Хаһыс кылаастан көмпүүтэр оонньуутун интэриэһиргээбиккиний?
Ол 90-c сыллар бүтүүлэригэр этэ. Ол кэмҥэ төрөппүттэрбин уонна 6 сыл балыс саастаах, оччолорго кыһыл оҕо, быраатымАйсены кытта Дьокуускайга КПД эргэ дьиэтигэр олорорбуппут. Биирдэ, тэлэбиисэринэн араас биэриилэр элэҥнээн көстө турар туох да уратыта суох сарсыардаларыгар, аҕам “Dendy” диэн суруктаах хоруопканы көтөхпүтүнэн киирэн кэллэ.
Үөрэн-көтөн, бу хоруопканы хасыһа туран, аны 20 сылынан бэйэбит Fntastic диэн көмпүүтэр оонньуутун айар хампаанньа хаһаайыттара буолуохпут диэн сэрэйбэт да буоллахпыт. Билигин бу хампаанньаҕа өрөспүүбүлүкэ улуустарын таһынан, Уһук Илин уонна Сибиир куораттарын 60-тан тахса талааннаах эдэр ыччата Интернет нөҥүө үлэлииллэр. Хампаанньа оонньуулара Америка, Кытай топ-чартарыгар киирэллэр.
Көмпүүтэргэ оонньуургун сөбүлүүгүн дуо?
Оҕо сылдьан, олбуорум оҕолорун мунньан, дьиэбэр приставкаҕа оонньуурбун сөбүлүүр этим. Көмпүүтэр оонньууларын туһунан кэпсэтииттэн саҕалаан, саҥа доҕоттору булуохха сөп этэ. Итинник билсэн, көмпүүтэрдиир эрэ буолбакка, футболлаан да тэбэр, бииргэ оонньуур буолбуппут. Онон көмпүүтэр оонньуута миэхэ оҕолору кытта билсэргэ көмөлөспүтэ.
Билигин мин көмпүүтэр оонньуутун оҥоруутун Аан дойду сайдыытыгар бэйэм кылааппын киллэрии, дьоҥҥо бырааһынньыгы, үөрүүнү-көтүүнү бэлэхтиир искусство курдук сыаналыыбын. 
Сахалыы сюжеттаах оонньууну оҥордугут дуо? Эбэтэр былааҥҥа баар дуу?
Оннук, сахалыы ис хоһоонноох оонньууну оҥоруу бэйэбит норуоппут култууратын харыстабылыгар, киэҥ эйгэҕэ тахсарыгар үчүгэй кылаат буолуо этэ. Ол эрээри биһиги чопчу бу билиҥҥи түгэҥҥэ өрөспүүбүлүкэбитигэр туһаны аҕала турабыт, сылтан сыл ахсын элбэх нолуогу төлүүбүт, эдэр ыччакка үлэ миэстэтин таһаарабыт. Спонсор быһыытынан Дьокуускайдааҕы АйТи- паарка куонкурустарыгар, Айыы Кыһата оскуолаҕа, Дьокуускайдааҕы сибээс уонна энергетика кэллиэһигэр көмөнү оҥоробут. Ковид кэмигэр тэрилтэлэргэ рециркулятордары бэлэхтээтибит. Өрөспүүбүлүкэбитигэр көмөбүт элбээтэр элбээн иһэр, онон инникитин эн этэрсахалыы сюжеттаах оонньууну оҥоруохпутун да сөп.
Көмпүүтэр оонньуутун ордук ханнык жанрын аан дойдуга сөбүлүүллэрий?
Киинэ киэнин курдук, көмпүүтэр оонньуутун жанрдара арахсаллар: хоррор, арт-хаус, кэмиэдьийэ, мүччүргэннээх сырыылаах… Билигин таһаараары сылдьар The Day Before оонньуу “выживание/приключения” диэн жанрга сыһыаннаах. Өссө “игровой блокбастер” диэн ааттыахха сөп, тоҕо диэтэххэ, The Day Before оонньууну билигин оонньуу индустриятыгар бастыҥ The Last of Us уонна The Division курдук оонньуулары кытта тэҥнииллэр. Онон The Day Before киинэ эбитэ буоллар, «Мстители» уонна «Бэтмен» таһымнаах буолуо этэ. Ыраах Саха сиригэр олорон, маннык улахан хардыыны оҥордубут! Биһиги хамаандабыт чилиэннэрэ олус талааннаахтар! Көмпүүтэр оонньуутун ханнык жанра ордук үчүгэйий диир буоллахха, хас биирдии оонньооччу бэйэтэ туспа санаалаах, интэриэстээх.
Ийэҥ, аҕаҥ, дьиэ кэргэниҥ эһиги иитиигитигэр, ситиһиигитигэр туох оруоллаахтарый? Оҕо эрдэххититтэн ситиһиигэ туһууланар этигит дуу?
Биһиги аҕабыт Иннокентий Иннокентьевич СӨ кинематографияҕа кэмитиэтин бэрэссэдээтэлинэн үлэлээбитэ. Ийэбит Саргылаана Ксенофонтовна – учуутал. Билигин кинилэр үтүөлээх сынньалаҥнарыгар дьоллоохтук олороллор. 
Төрөппүттэрбит биһигини кыра эрдэхпититтэн чиэһинэй, үтүө санаалаах, үлэһит буоларга үөрэппиттэрэ. Кинилэр иитиилэринэн, мин арыгы, табах диэни билбэппин, тымныы уунан куттан чэбдигирэбин. Бу барыта миигин тулалыыр эйгэбин, айылҕаны кытта ситимниир, эйэ-дэмниир. Эйэ-дэм (гармония) баар буоллаҕына, «ситиһиигэ хайдах тиийэбин” диэн төбөҕүн сыспаккын, барыта орун-оннугар буолан иһэр. Төрөппүттэрим маннык ииппиттэринэн дьоллоохпун.
Көмпүүтэр оонньуутун айыан баҕалаах оҕолорго тугу сүбэлиэҥ этэй?
Хайаан да өйдүөххэ наада: бу планетаҕа биһиги «ылаары» эрэ буолбакка, «биэрээри» олоробут. «Биэрэр» түгэҥҥэ бу сиргэ тоҕо кэлбиппитин өйдүүбүт. Атын дьоҥҥо көмө оҥорор санаа эһигини үрдүк ситиһиигэ сирдиир уонна тиэрдэр кыахтаах. Оччоҕо күүскэр күүс эбиллэн, өссө элбэҕи оҥорор кыах үөскүүр. Ханнык баҕарар кыһалҕаны, боппуруоһу быһаарар буолуоххут. Атын дьон олоҕун тупсарар үрдүк санааланнаххытына, олох-дьылҕа бэйэтэ эһигини өйүөҕэ. Уопсай дьыалаҕа бэйэбит кылааппытын киллэрэр түгэҥҥэ биһиги бэйэбит кыахпытынааҕар улахаҥҥа кыттыһабыт, ол барыта бэйэбитигэр үтүөнэн эргиллэн кэлэр. Оҕолорго unreal engine, photoshop, blender, 3dsmax бырагыраамалары үөрэтэргэ сүбэлиибин. Уонна классическай литератураны ааҕаргытыгар ыҥырабын. Классика сөпкө толкуйдуурга үөрэтэр уонна киэҥ билиини биэрэр. Көмпүүтэр оонньуута диэн искусство.
Таисия Алексеева keskil14.ru