Саха сириттэн үс хамаанда «Лига Знаний» Бүтүн Арассыыйатааҕы интеллектуальнай онлайн-викторинаҕа муҥутуур күүстээх ааты ылар иһин охсуһаллар, олор истэригэр — «Факел» бэһис кылаастар хамаандалара. Ол туһунан Саха НКИК саайта иһитиннэрэр.
Викторина сыл устата квиз-чемпионат быһыытынан ыытыллыаҕа. Бастакы талар оонньууга 2,4 тыһыынча киһи кыттыыны ылбыт. Саха сириттэн «Акула морская», «Факел» уонна «Бадаран» хамаандалар.
Саамай эдэр оонньооччуларынан өрөспүүбүлүкэҕэ Физико-техническэй лицей бэһис кылааһын үөрэнээччилэрэ Милена Александрова, Тимур Ефимов, Владимир Аржаков, Андрей Ступин уонна Андрей Иванов буоллулар. Кинилэр Бүтүн Арассыыйатааҕы таһымнаах викторинаҕа бастакыларын кытталлар.
«Биһиги бэйэбитин бэрэбиэркэлэнэн көрөөрү кыттарга санаммыппыт. Боппуруостар олус ыарахан этилэр. Билиибит уонна уопуппут тиийбэтэ хомолтолоох, ол эрэн өссө да холонуохпут», — диир Андрей Ступин.
«Бадаран» хамаанда састаабыгар үс дьүөгэлиилэр бааллар. Оонньууга кинилэр Россия араас куораттарыттан олорон кыттыбыттара . Хамаанда чилиэнэ, тутуу тэрилтэтин контент-менеджерэ Айталина Корнилова этэринэн, хамаанда аатын тылбааһа «грязь», «топь» диэн дьээбэлэнэн ааттаабыттар.
«Викторинаҕа сүрүнэ — бириэмэ, толкуйдуу охсон, түргэнник сөптөөх эппиэти бэриллиэхтээх. Интэриэһинэй бырайыак, Россия таһымыгар хамаандалары кытта күрэхтэһиэххэ, билиигин хаҥатыахха, саҥаны билиэххэ сөп», — диэтэ кини.
Викторинаны биир бириэмэҕэ онлайн көрүҥүнэн хамаанданан оонньуу рекордугар киирбит, Бүтүн Арассыыйатааҕы бастакы квиз-марафон салгыытын быһыытынан Россия «Знание» уопсастыбата киллэрбитэ.