Биһиги оскуолабытыгар олунньу 4 күнүгэр буолан ааспыт оскуолабыт бочуоттаах мецената, “Республикатааҕы инвестиционнай компания (РИК)” бастакы генеральнай дириэктэрэ, Россия бочуоттаах тутааччыта, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Чурапчы улууһун, Чурапчы, Одьулуун, Хадаар нэһилиэктэрин бочуоттаах гражданина Александр Иванович Федотов аатынан V өрөспүүбүлүкэтээҕи “Федотовскай аҕыылар” куонкурус сүрүн тэрийээччитэ Саха өрөспүүбүлүкэтин Үөрэх уонна наука министиэристэбэтэ буолар.
Бу тэрээһини ыытыыга министиэристибэ кадровой политика, государственнай сулууспа уонна юридическай хааччыйыы отделын кылаабынай специалиһа Августина Михайловна Родионова күүс-көмө, сүбэ-ама буолар. Манан сибээстээн биһиги Августина Михайловнаны көрсөн кэпсэттибит.
– Үтүө күнүнэн, Августина Михайловна, “Федотовскай ааҕыылар” иккис түһүмэҕэр хоһоон ааҕыытын куонкуруһа баар. Эһиги санааҕытыгар, физика уонна лирика туох сибээстээхтэрий?
– Урут уруккуттан “физики это лирики” диэн өйдөбүл баар. Физик дьоннор айар куттаах буолаллар. Ол иһин кинилэри лирик диэн эмиэ ааттыыллар.
– Оҕолор физиканы таптыыр, сөбүлүүр буолалларыгар эһиги санааҕытыгар туох нааданый?
– Бастатан туран, үчүгэй каадр наада. Биһиги өрөспүүбүлүкэбитигэр билигин физика учууталлара тиийбэттэр. Араас программалар үлэлииллэр. Холобур, “Земский учитель”, “Эдэр специалистары олорор дьиэнэн хааччыйыы”, “Арктика учуутала”. Ол гынан баран, физика учууталын идэтин бүтэрбит специалистар аҕыйахтар. Каадр тиийбэт буолан, оҕолор бу предмети талан ылан үөрэтэллэрэ ыарахаттардаах.
Биһиги өрөспүүбүлүкэбит Ил Дархана Айсен Сергеевич Николаев, үөрэх миниистирэ Нюргуна Афанасьевна Соколова улахан соругу туруордулар. Ол курдук быйылгы үөрэх дьылыгар физика, математика, информатика предметтэригэр ЕГЭ-ни туттарар оҕолор ахсааннарын элбэтиэхтээхпит.
– Биһиги оскуолабытыгар ыытылла турар “Федотовскай ааҕыылар” туһунан санааҕытын үллэстиэххит дуо?
– Бу куонкурус бэһис төгүлүн ыытыллар. Мин манна үһүс төгүлүн кэллим. Бу сүрдээх үчүгэй бырайыак. Тыа сирин кыра оскуолатыттан тахсыбыт бырайыак буолан, улахан сыаннастаах дии саныыбын. Манна олимпиада, литературнай ааҕыы, бырайыак көмүскээһинэ баар. Маннык бырайыак өрөспүүбүлүкэҕэ суоҕун кэриэтэ.
– Интервьюгут иһин баһыыба!
Сайаана ФЕДОРОВА, V кылаас,
С.Д. Флегонтов аатынан Хадаар орто оскуолата, Чурапчы