Ахсынньы 19 күнүгэр Ил Дархан Айсен Николаев Ил Түмэҥҥэ туһаайан этиитигэр үүнэр 2023 сылы Саха сиригэр Үлэ сылынан биллэрдэ.
Онтон сэтинньи 30 күнүгэр Ил Түмэн 41 уочараттаах мунньаҕар «Саха Өрөспүүбүлүкэтин «Үөрэхтээһин туһунан сокуонун»» 5.1. ыстатыйатыгар уларытыылары киллэрии” туһунан сокуон ылыллыбыта. Бу уларытыыны норуот дьокутааттара Ф.В. Габышева, А.А. Григорьева, М.Д. Гуляев, П.В. Ксенофонтов, О.Т. Михайлова, Р.В. Солнышкина, Р.Е. Федотов, А.Н. Атласова, А.Н. Николаев, И.И. Романов, М.С. Силкина, И.И. Слепцов, Л.Л. Явловская көҕүлээтилэр.
Бу туһунан keskil14.ru ситим таһаарыыта Саха Өрөспүүбүлүкэтин Ил Түмэнин наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэт бэрэссэдээтэлэ Феодосия Васильевна Габышеваттан туоһуласта:
— Саҥа сокуон 5.1 ыстатыйатыгар үлэнэн иитии тосхоло чопчуланна. Сүрүн сыал – сөптөөх усулуобуйаны тэрийэн оҕону үлэҕэ сыһыарыы, киниэхэ туһалаах үөрүйэхтэри иҥэрэн, айар дьоҕурун сайыннаран, олоххо бэлэмнээһин. Бу сокуону балачча өр кэмҥэ туруорсан ситистибит.
Үлэлии үөрэммит оҕо үөрэххэ сыһыана эмиэ атын, оттомноох буолар. Төрөппүт оҕото дьиҥнээх гражданин буолуон баҕарар буоллаҕына, оҕотун бэйэтин холобурунан иитиэхтээх. Дьиэ кэргэн истиҥ эйгэтин, Эһээ-Эбээ, Ийэ-Аҕа оскуолатын, күргүөмүнэн үөрэ-көтө үлэлиири туох даҕаны солбуйбат. Ханнык эмэ итэҕэс-быһаҕас баар да буоллаҕына, оскуола ону ситэрэн-хоторон биэриэхтээх, ыччаппытыгар олоххо наадалаах сүрүн өйдөбүллэри иҥэрэр кэскиллээх үлэни сөргүтүөхтээх. Барытын элбэх үп-харчы эрэ быһаарар буолбатах. Биллэн турар, оскуолаларга материальнай база (көмө хаһаайыстыба, лааҕыр, тиэхиньикэ, үлэ тэрилэ) сөптөөхтүк тэриллиэхтээх эрээри, оҕо араас кыһалҕаны сатаан быһаарсарга күннэтэ иитиллиэхтээх.
Саҥардыллыбыт федеральнай судаарыстыбаннай үөрэх ыстандаартынан үлэнэн иитии маннык ыытыллыан сөп:
— «Технология» уруогар;
— факультативнай уонна элективнэй куурустарга («Маһынан кыһыы», «Кулинария төрүттэрэ», «Интерьер дизайна», «Оҕуруокка үлэ», «Иис» уо.д.а);
— оҕону араас хайысхалаах социальнай бырагыраамаларга кытыннарыы (уопсастыбаҕа туһалаах хамсааһыннар, субуотунньуктар, волонтёр этэрээттэрэ).
Үөрүөхпит иһин, алтынньы 16 күнүгэр Российскай Федерация Судаарыстыбаннай Дууматын бэрэссэдээтэлэ Вячеслав Володин үөрэхтээһин кэмитиэтигэр оҕону үлэнэн иитии туһунан сокуон барылын оҥороругар сорудахтаата. Үөрэх миниистирэ Сергей Кравцов бу этиини эмиэ өйүүрүн биллэрдэ. Онон дойду бүттүүнүн үрдүнэн хамсааһын тахсарын күүтэбит.
keskil14.ru