Саха Өрөспүүбүлүкэтин Судаарыстыбаннаһын күнүгэр, балаҕан ыйын 27 күнүгэр, Филипп Гаврильевич Охлопков аатынан Майа орто оскуолатыгар оскуола лиидэрин талар быыбар буолан ааста.
Оскуола лиидэригэр түөрт хандьыдаат турбута: үс онус кылаас үөрэнээччилэрэ уонна биир 9 кылаас үөрэнээччитэ.
Быыбарга оскуола үөрэнээччилэрэ уонна оскуола үлэһиттэрэ кыттыыны ыллылар. Хандьыдааттар бырагыраамаларын уонна бэйэлэрин билиһиннэриилэрэ Интернет ситимин нөҥүө ааспыта. Хас биирдии оскуола лиидэригэр бэйэтин туруоруммут оҕо Zoom платформа нөҥүө дебатка кытынна.
Куоластааһын куйаар ситимин нөҥүө ыытылынна. Оскуола үөрэнээччилэрин, үлэһиттэрин итэҕэллэрин ылан, 10 “б” кылаас үөрэнээччитэ Юлия Петровна Корякина кыайда. Юля бырагырааматыгар «Араадьыйа күнүн» ыытыы, оскуола эмблемалаах араас бородууксуйаны оҥорон таһаарыы, оҕолор талааннарын арыйар араас күрэхтэри ыытыы, волонтерствонан дьарыктаныы, араас конференциялары, семинардары, тэрээһиннэри ыытыы киирбиттэрэ.
Юляҕа баҕарыа этибит туруоруммут сыала олоххо киирэригэр, үөрэҕэр үрдүк ситиһиилэри!
Яна Васильева, Ф.Г. Охлопков аатынан Майа орто оскуолатын педагог-организатора.