Кулун тутар 23 күнүттэн муус устар 13 күнүгэр диэри биһиги өрөспүүбүлүкэтээҕи «Эргиэн» бизнес-оонньуу кыайыылаахтара буоламмыт бүтүн Арассыыйатааҕы «Океан» оҕо киинигэр сынньанар чиэскэ тиксибиппит. Оҕо сааспыт умнуллубат күннэрэ Японскай муора таһыгар турар кииҥҥэ олус сэргэхтик аастылар.
Сахабыт сириттэн уопсайа 20 оҕо буолан айаннаабыппыт, оскуолабытыттан бэһиэ этибит. Бары ‘Бригантина» дружинаҕа, икки хайысхаҕа «ПРОспорт» уонна «Технофестиваль» диэн сменаларга, биир этэрээккэ сылдьыбыппыт. Тиийээппитин кытары биһигини «Океан» киин инфраструктурата сөхтөрбүтэ. Олус улахан, муораны көрөн турар киэн территорияҕа турар эбит. Тутуулар барыта муора тематикалаах тутуллубуттар. Холобура, биһиги олорбут «Бригантина» корпуспут саамай бастакы Сэбиэскэй Союз саҕанааҕы тутуу, тас көстүүтүнэн улахан маҕан лайнерга майгынныыр. Ол курдук, киһи олороругар, сынньанарыгар, сайдарыгар туох баар усулуобуйа барыта тэриллибит.
Күннэтэ режимынан биэстэ аһыыбыт, үөрэнэбит. Үөрэхпитин ДВФУ-тан сылдьар преподавателлар олус интэриэһинэйдик, сэргэхтик ыыталлара. Үөрэх курстарыгар сылдьарбыт: судостроение, автогород, программирование. Олус интириэһинэй курстар этилэр, манна маһынан биирдии бэйэбит хараабыл оҥорбуппут, компьютерга оонньуу оҥорорго үөрэммиппит, автогородка симуляторга массыына ыытары, суол быраабылаларын үөрэппиттэрэ. Ону таһынан илиинэн үлэҕэ араас оҥоһуктары оҥорор этибит. Киэһэтин этэрээтинэн араас тэрээһиннэр буолаллара. Маннык хас биирдии күммүт олус ураты, сэргэх буолара. Баһаатайдарбыт Коля уонна Вероника хас биирдиибитигэр кыһаллан, олус үчүгэйдик көрөллөрө.
«Океаммыт» биһиэхэ элбэх доҕоттору, умнуллубат күннэри бэлэхтээтэ. Оҕолорбутун, баһаатайдарбытын кытары сибээспитин быспаппыт, күннэтэ кэпсэтэн, үөрүүбүтүн үллэстэбит. Бу айаммыт туоларыгар, тэрээһинигэр көмөлөспүт дьоммутугар махталбытын тиэрдэбит Посельскай Семен Семеновичка, эрэгийиэннээҕи операторбытыгар Айталина Андреевнаҕа, айаҥҥа көрөн илдьэ сылдьыбыт Сардана Власьевнаҕа, салайааччыларбытыгар Айталина Ивановнаҕа, Ирина Игнатьевнаҕа, Ирина Владимировнаҕа. Оҕолор тустарыгар кыһамньылаах үлэҕит үтүө түмүктэрдээх буоллун, ситиһиилэр куруутун арыаллыы сырыттыннар!
Карина ВАСИЛЬЕВА, Хаптаҕай оскуолатын 10 кылааһын үөрэнээччитэ.