Үйэттэн үйэҕэ саха төрүт оонньуулара олох хаамыытыгар сөп түбэһиннэрэн быраабылалара уларыйар. Ыччат, нэһилиэнньэ утумнаах дьарык оҥостон, эттэрин-хааннарын сайыннарар спорт көрүҥнэригэр кубулуйдулар.
Тутум эргииргэ «Дыгын оонньууларын» рекордсмена Вячеслав Дьяконов (76)
Олортон биирдэстэрэ- тутум эргиирэ. Тутум эргиирэ саха төрүт оонньууларыттан биирдэстэрэ. Билигин күрэхтэһиилэргэ ыытыллар спорт көрүҥэ буолар. Мас уһуна 25 см, эргимтэтэ 3 см, мас үөһээ өттө бүлтэгэр буолар. Кыттааччы икки мүнүүтэ иһигэр маһын дуоскаттан араарбакка эргийэр. Сири таарыйыа суохтаах. Биһиги тутум эргиинэн дьарыктанар оҕолору кытта кэпсэттибит.
Богдан Яковлев, Дьокуускай 12 нүөмэрдээх оскуолатын 6 үөрэнээччитэ, «Боотур» кулууп иитиллэччитэ:
Уйбаан Белолюбскай «Боотур» кулуубугар үһүс сылбын дьарыктанабын. Онно биһиги сүүрэбит, элбэх хамсаныылаах дьарык оҥоробут. Спорду олус сөбүлүүбүн, улахан оруоллаах. Тутум эргиирэ биир саамай сөбүлүүр көрүҥнэрбиттэн биирдэстэрэ. Киһи бэйэтигэр эрэллээх, кыанар киһи буоларга уһуйуллар. Манна киһи сөптөөхтүк тыыныахтаах, атаҕын сөпкө ууруохтаах, сиһэ ыалдьыа суохтаах. Мин икки мүнүүтэҕэ көрдөрүүм — 47. Тутум эргииринэн дьарыктаныҥ, эт-хаан өттүнэн садйыҥ! Дьулус! Тулуй! Кыай!
Алгыс Петров, Дьокуускай 17 нүөмэрдээх оскуолатын 11 кылааһын үөрэнээччитэ:
Тутум эргииринэн кыра эрдэхпиттэн дьарыктанабын. Саха многоборьетыгар Альберт Алексеевич Готовцев сирдээбитэ. Бу дьарык киһи имигэс, тарбахтара күүстээх буолалларыгар көмөлөһөр. Былчыҥ барыта сайдар. Мин икки мүнүүтэҕэ 40 эргийэбин.
Айна Максимова, Дьокуускай 17 нүөмэрдээх оскуолатын 11 кылааһын үөрэнээччитэ:
Многоборье араас көрүҥнэринэн дьарыктибын. Оттон чуолаан тутм эргииринэн 10 сааспыттан. Климентина Евгениевна Винокурова, Андрей Николаевич Шарга уонна Айаан Сергеевич Чоросов дьарыктаабыттара. Тутум эргиирэ дьиҥэр олус судургу. Быраабылата илиигин маскыттан ылбаххын, хостообоккун, муостаны таарыйбаххын, маскын хостообоххун. Күрэхтэһиигэ кыһыылаах буолааччы, кыратык муостаны таарыйдаххына, тута курэхтэн сотуллаҕын. Тутум эргиирэ сахалыы национальнай көрүҥ буолан олус учугэй, оҕолорго дьарыктаныҥ диэн сүбэлиэхпин баҕарабын.
Станислав Максимов, Л.Н Харитонов аатынан Маҕарас орто оскуолатын 10 кылааһын үөрэнээччитэ:
Айталина Степановна Колодезникова салайар «Өбүгэ оонньуута» кружокка дьарыктанабын. Оскуола хамаандата улууска, республикаҕа кыттааччыбыт. Илиилэрбин сыһыары тутан, атахпын эмиэ чугас тутаммын, сиспин кэдэтэммин, тааспын тургэнник хамсатан эргийэбин. Тутум эргиирэ сымса буоларга, түргэнник толкуйдуурга үөрэтэр.
Семен Максимов, 20 саастаах, Чурапчытааҕы аграрнай-техническэй колледж устудьуона:
Тутум эргииринэн Айталина Степановна Колодезниковаҕа 6 кылаастан дьарыктаммытым . Оскуолабытыгар «Өбугэ оонньуута» куруһуокка сылдьан хабылыкка, хаамыскаҕа, ойбонтон уулааһыҥҥа, тутум эргииргэ дьарыктаммытым. Мин санаабар, тулуурдаах буоларга үөрэтэрэ уол киһиэхэ туһалыыр. Оскуланы бутэрэн баран нэһилиэгим чиэһин көмүскээбитим. «НВК Кубогар» тутум эргииргэ ситиһиилээхтик кыттыбытым.
Эльдар САДОВНИКОВ