Бүгүн, атырдьах ыйын 19 күнүгэр, «Энергетик» лааҕырга күүтүүлээх тэрээһиммит ааста. Тимофей Сметанин уонна Яков Стручков «Мэхээлэчээн булчут кэпсээннэрэ» («Байки охотника Мэхэлэчэна») диэн айымньыларынан оҕолор театральнай туруоруу көрдөрдүбүт. Тэрээһини лааҕыр иитиллээччилэрэ Устя Лазарева уонна Родион Кулбардинов иилээн-саҕалаан ыыттылар.
Эдэр артыыстар талааннарын «Кэскил» оҕо бэчээтин кыһатын сүрүн редактора Татьяна Чьямова, «Сахабэчээт» тэрилтэ генеральнай дириэктэрэ Ньургуйаана Стручкова, «Улусмедиа» сүрүн редакторын солбуйааччы Зинаида Григорьева уонна бу күһүн улахан экраҥҥа тахсыахтаах «Мэхээлэчээн булчут» киинэ режиссера Александр Лукин сыаналаатылар.
Хас биирдии этэрээт биир хамаанда буолан, көстүүмүттэн саҕалаан декорациятыгар тиийэ олус кыһамньылаахтык бэлэмнэммит. Оҕолор артыыс талааннарын арыйаннар, бастыҥнар маннык анал аакка тигистилэр:
- Бастыҥ көстүүм – «Drive» маҥнайгы этэрээт
- Бастыҥ декорация – «Гепард» алтыс этэрээт
- Бастыҥ оруол – Андрей Тарабукин
- Бастыҥ актриса – Анеля Удина
- Бастыҥ режиссура – «Радужные искрята» сэттис этэрээт
Оттон хамаанданан уопсай түмүк маннык таҕыста:
- 1 миэстэ – «Прикольные ребята» үһүс этэрээт
- 2 миэстэ – «Drive» маҥнайгы этэрээт
- 3 миэстэ – «Радужные искрята» сэттис этэрээт
Маны таһынан, «Мэхээлэчээн булчут» киинэ хамаандата анал бирииһин – пресс-көрдөрүүгэ икки билиэти – Карина уонна Ева Ивановаларга, саамай кырачаан кыттааччыларбытыгар, «Радужные искрята» этэрээккэ, «Мэхээлэчээн булчут кэпсээннэрэ» комиксы бэлэх уунна.
Бүгүҥҥү тэрээһин оҕолорго олус туһалаахтык, көхтөөхтүк ааста. Кэлбит ыалдьыттарбытыгар, кыттааччыларбытыгар уонна тэрийээччилэргэ барҕа махталбытын тиэрдэбит. Баҕар, ким эмэ бу испэктээктэн кынаттанан олоҕун дьарыгын булуоҕа.
Ганна Алексеева, Хомустаах сүрүн оскуолата, Үөһээ Бүлүү
keskil14.ru