Оскуолабытыгар Тиһэх чуораан чугдаарда. Ону кытта доҕотторбут улахан олох аартыгар үктэнэн, саамай эппиэтинэстээх кэмнэрэ үүннэ. Бүгүҥҥү выпускниктар кэккэлэригэр «Кэскил» медиа оскуола юнкора Виктория Борисованы көрсөн кэпсэттим.
– Вика, Тиһэх чуораан хайдах ааста?
– Эмиэ да үөрүүлээх, эмиэ да хомолтолоох уонна олус долгутуулаах күн ааста. Бэйэбэр ытыам суоҕа диэн тылбын биэрбитим эрээри, ытыы турарбын бэйэм да өйдөөбөккө хааллым. Бастакы кылаастан саҕалаан үөрэппит учууталларбыт Прасковья Дмитриевна уонна Лилия Егоровна кэлбиттэрэ, аһаҕас уруок ыыппыттара, алгыс тылларын эппиттэрэ долгутуулаах этэ.Ону таһынан стипендия, номинация, Махтал сурук, эҕэрдэ сурук туттубут. Биир күҥҥэ олус элбэх түгэн буолан ааста.
– Хайа идэни таллын, ханнык үөрэххэ туттарсаҕыный?
– Кыра эрдэхпиттэн идэбин эрдэттэн билэр курдук этим, билигин кэлэммин журналист идэтин баһылыырга санана сылдьабын. Онон сибээстээн Хотугулуу Илиҥҥи Федеральнай университет саха норуотун култууратын үөрэтэр институт журналистика салаатыгар киириэхпин баҕарабын.
– Бастакы экзаменын ханныгый?
– Бастакы экзаменым нуучча литературата. Бу миэхэ саамай эппиэтинэстээх экзаменым. Баҕарар үөрэхпэр киирэрбэр саамай суолталаах, быһаарыылаах сүрүн предметым буолар
– Вика, барыта этэҥҥэ буоллун. Стиһиилэри!
Вадим КОЛЕСОВ, Х кылаас,
А.П. Илларионов аатынан Хайахсыт орто оскуолата, Чурапчы