Олунньу 11 күнүгэр Кэптэни бөһүөлэгин Бүөтүр Оҕотоойоп аатынан сынньалаҥ киинигэр улуустааҕы «Ыллаа-туой, уол оҕо-2026» ырыа күрэҕэ буолан ааста. Уопсайа 15 нэһэлиэк 18 оскуолатыттан 91 ыллам ырыалаах уолан уоланнар күөн көрүстүлэр.
Күрэх биир уратыта диэн хас биирдии кыттааччы, ансаамбыл иккилии ырыаны толорор, ол эбэтэр бастакы ырыата ХХ үйэ кэминээҕи буолуохтаах уонна иккис ырыата ХХI үйэ ырыата көҥүл тиэмэҕэ. Бырайыак ааптара Лугинова Зинаида Петровна 26 сыл аннаараа өттүгэр төрүттээн, күн бүгүнүгэр диэри таһымнаахтык ыытылларын туһугар сүүрэ-көтө сылдьар.
Дьүүллүүр сүбэнэн үлэлээтилэр:
• Альбина Николаевна Бурнашева
• Валентина Романовна Варламова
• Дмитрий Егорович Бурнашев
Ол курдук, быйылгы ырыа түһүлгэтигэр «Көрөөччү биһирэбилин» Анал ааты уонна 5000 тыһ. уу харчынан наҕараадаланна Лөгөй лиссиэй-интэринээтин 5 кылааһын үөрэнээччитэ Дамир Прядезников, сал. В.К Фёдорова.
Маны тэҥэ ГРАН-ПРИ үрдүк аатын уонна 8000 тыһ. уу харчынан наҕараадаланна Мүрү 2 нүөмэрдээх орто оскуолатын 8 Б кылааһын үөрэнээччитэ Айсиэн Кутуков, сал. У.Е Стрекаловская.
Ол курдук, күрэх үрдүк таһымнаахтык ыытылларыгар бириистэри олохтоотулар араас сыллардааҕы «Ыллаа-туой, уол оҕо» күрэх Гран-При хаһаайыттара уонна кыттаачылара.
Быйыл Талыы талба курдаах Таатта улууһугар олунньу ый бүтүүтэ Өрөспүүбүлүкэтээҕи 26 төгүлүн «Ыллаа-туой, уол оҕо!» ыытыллыаҕа онон биһиги улууспут ыллам ырыалаах уоланнарыгар өрөспүүбүлүкэтээҕи күрэххэ ситиһиини баҕарабыт!
Янис СЫСОЛЯТИН, Лөгөй лиссиэй-интэринээтин LegMedia киин юнкора