Атырдьах ыйын 5-17 күннэригэр Еланкаҕа өрөспүүбүлүкэтээҕи тхэквондо лааҕырыгар сылдьан кэллим. Бу лааҕырга араас улуустартан оҕолор кэлбит этилэр: Уус Алдантан, Хаҥаластан, Мииринэйтэн уо.д.а. сирдэртэн.
Атырдьах ыйын 5 күнүгэр оҕолор бары, уопсайа 20 оҕо уонна 3 тренер, мунньустан үлэбитин, дьарыкпытын саҕалаабыппыт. Мин ийэм Ольга Гаврильевна бу лааҕырга поварынан үлэлээбитэ.
Биһигини сарсыарда 7:00 чааска уһугуннараллара. 7:15-8:15 ч. — сэрээккэ, 9:00 ч. — сарсыардааҥҥы аһылык, онтон 10:30 — 12:30 ч. дьарык буолар этэ. Тренердарбыт Самсонов Иван Александрович уонна Лукшин Вячеслав Валерьевич дьарыктаабыттара, эрчийбиттэрэ. Дьарык төһө да ыарахан буоллар, күүстээх, сымса буолар санааттан ыарахаттары тулуйан, туруулаһан, инним диэки баран иһэрим.
13:00 ч. эбиэттээн баран, 16:00 ч. диэри утуйар, сынньанар этибит. 16:00 ч. түөттүргүлээн баран, киэһээҥҥи дьарыкка 18:30 ч. диэри тахсар этибит. Киэһээҥҥи дьарыкка хайаҕа баран 5-10 сүүрэн тахсыы оҥорор этибит.
Киэһээ 19:00 чааска киэһээҥҥи ас кэнниттэн бэйэни дьарыгырарбыт. Ол быыһыгар футболлуур, дуобаттыыр, саахыматтыыр, хаартылыыр этибит. 21:00 ч. иккис киэһээҥҥи аһылык буолара, онтон 22:00 ч. төлөпүөннэрбитин ылаллара.
Бу сылдьан мин Уус Алдан тренерын Сысолятин Захар Ивановичтыын билсибитим. Кини миэхэ саамай аламаҕай, элэккэй майгылаах уонна оҕолорго барыларыгар үчүгэй сыһыаннаах этэ. Бары уолаттар кинини убай оҥостон биир дьиэҕэ олорбуппут.
Атырдьах ыйын 16 күнүгэр, лааҕырбыт бүтэһик күнүгэр, Улахан Ааҥҥа Айыы Уолун түмэлигэр бара сылдьыбыппыт. Киэһээ повардарбыт бырааһынньык остуолун тэрийбиттэрэ. Киэһээ дискотека уонна «Королевская ночь» буолбута. Бу күн саамай умнуллубат күн буолбута. Сарсыҥҥытыгар Покровскай куораттан тойоттор, хотуттар кэлэн үлэһиттэргэ махтал сурук туттарбыттара. Эбиэт кэннэ оҕолор бары быраһаайдаһан, дьиэбитигэр тарҕаспыппыт.
Бу курдук икки нэдиэлэ устата күннээҕи режими, бэрээдэги тутуһарга, эти-хааны эрчийэргэ, атын оҕолордуун алтыһарга үөрэннибит. Оҕолор майгылара, бэйэ-бэйэҕэ сыһыаннара үчүгэй этэ.
Бу лааҕырга мин спорту кытта доҕордоһо, дьону кытта кэпсэтэргэ үөрэнним. Ийэбэр бу лааҕырга миигин ыытан спортка сыһыарбытыгар улахан махталбын тиэрдэбин. Махтаныам этэ тренердарбар: Иван Александрович Самсоновка, Захар Иванович Сысолятинҥа уонна Вячеслав Валерьевич Лукшинҥа миигин дьарыктаабыттарыгар уонна мин олохпор умнуллубат үчүгэй лааҕыры тэрийбиттэригэр! Ити курдук атырдьах ыйын күннэрин олус туһалаахтык бу лааҕырга атаардым. Барыларыгар махтал!
Аман Еремеев, И.М. Яковлев аатынан Покровскай 1 №-дээх оскуолатын 9 «в» кылааһын үөрэнээччитэ, эдкор.
keskil14.ru