Бу күннэргэ Владивостокка «Океан» оҕо киинигэр «Океан подмосткалара» диэн оскуола тыйаатырдарын бэстибээлэ саҕаланна. Саха сирин аатыттан Ньурба улууһун С.С. Потапов аатынан Убайаан орто оскуолатын «Экспрессия» оҕо тыйаатырын устуудьуйата кыттыыны ылар.
2024-2024 үөрэх дьылыгар С.С. Потапов аатынан Убайаан орто оскуолатыгар «Экспрессия» театральнай устуудьуйа Роман Афанасьевич Семенов салалтатынан үлэтин саҕалаабыта. Кыайыы 80 cылыгар анаан «А зори здесь тихие» диэн испэктээги туруорбуттара.
Роман Семенов – Ньурбатааҕы көһө сылдьар драматическай тыйаатырын кэскиллээх эдэр артыыһа, СӨ култууратын туйгуна. «Экспрессия» устуудьуйаҕа 7,9,11 кылаас оҕолоро сөбүлээн дьарыктаналлар. Станиславскай систематынан сценречька, актерскай мастерствоҕа, пластикаҕа үөрэнэллэр.
Устуудьуйа ситиһиитэ:
— 29-с Өрөспүүбүлүкэтээҕи оскуолалар театральнай коллективтарын иһинэн ыытыллар Ю.Р. Козловскай аатынан «Синяя птица» I истиэпэннээх лауреат үрдүк аатын ылбыттара.
— Тихонов Максим, 10 кылаас үөрэнээччитэ «Лучшая мужская роль» номинация хаһаайына буолбута.
— Өрөспүүбүлүкэтээҕи театральнай кэтэхтэн «Маска-2025» күрэххэ I истиэпэннээх лауреат үрдүк аатын ылбыттара.
— Тихонов Максим «Лучшая мужская роль» номинацияҕа кыайыылаах дипломун ылбыта. Максим Ил Дархан Саҥа дьыллааҕы Харыйатын кыттыылааҕа.
Улахан сценаҕа оҕолор Ньурбатааҕы көһө сылдьар драматическай театрга бастакытын тахсан «А зори здесь тихие» испэктээги итэҕэтиилээхтик оонньоон көрдөрбүттэрэ, зал тобус-толору көрөөччү этэ. Испэктээк кэннэ төрөппүттэр, учууталлар оҕолор хайдах курдук талааннаахтарын сөҕө-махтайа кэпсээбиттэрэ, ытыс тыаһын харыстаабакка бэлэхтээбиттэрэ. Ол кэннэ Чаппанда нэһилиэгэр гастроллаабыттара. Олохтоох дьон биһирэбилин ылбыттара.
СӨ Үөрэх уонна билим Министиэристибэтин «Юные якутяне» ресурснай киинэ махтал суругунан театральнай студия күрэхтэргэ, фестивалларга кыайыыларын бэлиэтээн, оҕолор билигин Арассыыйатааҕы «Океан» лааҕырга 21 хонукка сынньана бардылар.
Кэскил14.ру