Алексей Елисеевич Кулаковскай – Өксөкүлээх Өлөксөй «Оттоку олук алгыһа» айымньытыгар эдэр ыччаттарга, кэлэр кэнэҕиски көлүөнэҕэ олус сөптөөх сүбэ-ама биэрбит. Эйэлээх олох, истиҥ сыһыан, үтүө санаа эрэ алтыстын диэн алҕыыр. Чугас дьоҥҥор, доҕоторгор-атастаргар күүс-көмө буол диэн сүбэлиир.
Атын омуктары кытары иллээх сыһыаны олохтуурга ыҥырар. Ыарахаттартан самныбахха, куруутун иннин диэки дьулуһарга, сахабыт омугун ааттатан үрдүк чыпчаалга дабайан, үтүөҕэ-кэрэҕэ тардыһын диэн этэр.
Саха уруут-урууккуттан чулуу омук быһыытынан биллэр. Күүстээх санаалаах, тулуурдаах, дьоҕурдаах норуоппут. Тыйыс тымныы кыһыннаах, куйаас чэбдик сайыннаах дойдуга төрөөн-уһаан, үлэни өрө тутан үлэлии-хамсыы сылдьабыт. Айылҕа оҕолоро буоламмыт айыыларбыт араҥаччылаан, күүс-кыах ыламмыт туохтан да толлубаппыт.
Биһиги, саҥа көлүөнэ оҕолоро, дойдубут туһугар кыһаллан, үүнэ-сайда туруохтаахпыт. Сахабыт сирэ өссө да тупса, чэчирии турарыгар түмсүүлээх, биир сомоҕо буолан үлэлиэххэйин, кыһаллыаххайын, чөл олоҕу тутуһуоҕун диэн ыҥырабын!
Бэргэн Трофимов, С.А.Новгородов аатынан Чурапчы орто оскуолатын 10 кылааһын үөрэнээччитэ