Бу дьыл, муус устар 12 күнүгэр, улуу Кыайыы 80 сылыгар, РФ Аҕа дойдуну көмүскээччи, Саха республикатыгар Ийэ дойдуну көмүскээччи сылыгар, Томпо оройуонугар “Саха КВН” ы төрүттээччилэртэн биирдэстэрэ, Саха республикатын Олоҥхо театрын эдэр, кэскиллээх, талааннаах артыыһа Егоров Егор Прокопьевич сырдык кэриэһигэр анаммыт VIII аһаҕас “Саха КВН” күрэҕэр “Сатабыл” Оҕо айымньытын дьиэтин иһинэн үлэлиир “Ситик” оҕо тэрилтэтин лидердара 2 хамаанданан баран кыттан кэллибит. Наһаа астыктык сылдьан, бэйэбитин туохха сыһыаннаахпытын, сатыырбытын көрдөрөн, «Саха КВН»ы таптыырбытын, сөбүлээн оонньуурбутун, биир хамаанда буолан түмсүүлээхпитин биллэрэн кэлбиппититтэн олус үөрдүбүт, дуоһуйдубут.
Кириэс – Халдьаайы орто оскуолата, дьоно – сэргэтэ бу тэрээһин үрдүк таһымҥа ыытылларыгар олус бэлэмнэммиттэр. Ол курдук Егор Егорович дьиэ кэргэнэ, ийэтин аймахтара, оскуолаҕа бииргэ үөрэммит оҕолоро, АГИТИга бииргэ үөрэммит студеннара, Л.М.Мекюрдянов аатынан оҕо искусстватын оскуолатын коллектива, уо.д.а. бары күүс – көмө буолан хас биирдии хамаандаҕа бириис туруоран, харчынан бириэмийэ бөҕө олохтообуттара киһини сөхтөрдө. Егор Егорович кылгас гынан баран чаҕылхай олоҕун хас биирдии киһи дууһатыгар киирэр гына билиһиннэрэн, кини аата уһун сылларга сүппэт гына бэлиэ оҥордулар.
Биһиги Ситиктэр бу күрэххэ кыттан ситиһии бөҕөлөөх кэллибит.
Ол курдук: «Ситик» хамаанда «Бастыҥ көрүдьүөс» анал ааты ылан Егор Егорович ийэтин аймахтарыттан 4000 харчынан бириэмийэ уонна кубок ыллылар. Уранаев Дьулус «Бастыҥ хапытаан» анал ааты ылары ситиһэн Леонид Николаевич Охлопковтан 5000 харчынан бириэмийэни уонна кубок тутта. Бүтэһиккэ ГРАН — ПРИ буолан кыайыы өрөгөйүн билэн Егор Егорович оскуолаҕа бииргэ үөрэммит оҕолоруттан 15000 харчынан бириэмийэни уонна кубок ылан үөрүүбүт өссө үрдээтэ.
«Талах курдаахтар» хамаанда «Алтан чуораан» анал ааты ылан Л.И.Мекюрдянов аатынан оҕо искусство оскуолатын коллектива туруорбут 7000 харчынан бириэмийэ, кубок туттулар. Ону таһынан «Бэйэнии билиһиннэрии» анал ааты ылан ийэтин аймахтарыттан 5000 харчынан бириэмийэ уонна кубок ылан хаһыы улаатта. Аны хапытаан Егоров Володя «Көрдөөх Көкөт» анал ааты ылан Егор Егорович аймаҕа Иннокентий Иннокентьевич Степановтан 3000 харчынан бириэмийэни уонна кубогы тутта. Маны таһынан бүтэһиккэ БАСТАКЫ ҮРДЭЛ буолан АГИТИга бииргэ үөрэммит оҕолоруттан 13000 харчынан бириэмийэ уонна кубок ылан туруоруммут сыалларын ситиһэн үөрүү үрдэ суох буолла.
Хамаанданы тэрийэн илдьэ сылдьыбыт «Сатабыл» Оҕо айымньытын дьиэтин педагог – организатора, “Ситик” оҕо тэрилтэтин салайааччыта «Саталлаах салайааччы» анал ааты ылан Егор ийэтин кытта бииргэ үөрэммиттэртэн 6000 харчынан бириэмийэ тутта.
Ыалдьытымсах Кириэс – Халдьаайы орто оскуолатын иитэр үлэҕэ директоры солбуйааччыга, бу күрэхтэһии үрдүк таһымҥа барарыгар ис сүрэҕиттэн кыһаллыбыт, сүүрбүт – көппүт, дьону түмэ тарбыт Мария Петровна Габышеваҕа, Егор Егоровиһы кытта алтыспыт доҕотторугар, аймахтарыгар, Кириэс – Халдьаайы олохтоохторугар уонна бу суол алдьанан эрэр кэмигэр саллыбакка биһигини илдьэ сылдьыбыт эйэҕэс, истиҥ сыһыаннаах суоппардарбытыгар Петров И.С. уонна Попов Е.Е. улахан махталбытын тиэрдэбит.
Матрена Алексеева
Тааттатааҕы «Сатабыл» оҕо айымньытын дьиэтин педагога.