Егор Борисов бастакы хайҕала – грамота

Биһиги Егор Афанасьевич Борисовы кытта көрсөн кэпсэттибит. Кини Российскай Федерация сентора, 2010-2018 сылларга Саха өрөспүүбүлүкэтин салайбыт Бэрэсидьиэн, Ил Дархан.

Мин Егор Афанасьевичтан олоҕор аан бастаан хайҕаммыт, үтүө быһыыны оҥорбут саамай өйдөөн хаалбыт түгэннэрин туһунан ыйыттым.

Онуоха кини маннык хоруйдаата:

– Оҕо сылдьан олус мэник этим. Биир сиргэ олорбот, сүүрэ-көтө, эргичийэ сылдьан барытын истэ-билэ сылдьар оҕо этим. Саамай өйдөөн хаалбыт хайҕаммыт түгэним диэн иккис кылааска үөрэнэ сырыттахпына буолбута. Саҥа дьылга харыйа аттыгар аан бастаан грамота туттарбыттара. Ол грамота «за отличную учебу и хорошее поведение» диэн суруктаах этэ. Ол сурук бастакы тылларын өйдүүбүн. Тоҕо диэтэххэ, үөрэхпэр үчүгэй этим. Оттон «за хорошее поведение» диэн миэхэ утарсыылаах соҕус этэ.

Бастакы хайҕабылы ыламмын, грамота диэн олус суолталаах эбит диэн өйдөөбүтүм. Миигин эҕэрдэлээн ытыс таһыммыттара. Кыбыста-кыбыста, кэтэхпин тарбана-тарбана нэһиилэ тахсан ол грамотабын туппутум.

Онтон үөрэхпэр куруутун үчүгэй этим. Ордук математика, физика, химия предметтэригэр олус интэриэстээхтик үөрэммитим. Үөрэтэллэрин ылынар этим. Бэйэм эккирэтэ сылдьан, иҥэн-тоҥон үөрэтэрбин өйдөөбөппүн эрээри, учууталлар биэрэр уруоктарын бэйэбэр иҥэринэр этим. Онтукам кэнники интэриэс буолбута. Ол түмүгэр оскуолаҕа үөрэнэ сылдьаммын высшай математика элеменнэрин үөрэтэр кыахтаммытым. Ол иһин «Квант», «Наука и жизнь» сурунааллары суруттаран, интэриэһиргиир тиэмэлэрбин үөрэтэр этим. Бэйэм курдук интэриэстээх Валентин Верховцев диэн табаарыстааҕым. Кинини кытта иккиэн дьарыктанар этибит. Оройуон, өрөспүүбүлүкэ олимпиадаларыгар үс предмеккэ – физикаҕа, химияҕа уонна математикаҕа наар кыттарым. Бастыырын бастаабат этим да, көхтөөхтүк кыттар этим. Ол иһин оскуоланы бүтэрэрбэр Саха госуниверситетыгар физико-математическай факультекка экзамена суох киирэргэ анал ыҥырыыны туппутум. Ийэм соҕотох буолан, киниэхэ көмөлөһөн, оскуола кэнниттэн дойдубар рабочайынан үлэлии хаалбытым. Онтон Новосибирскайга үөрэммитим.

Оскуолаҕа үөрэнэр кэммэр общественнай үлэҕэ, уопсай дьыалаҕа кыттар этим.

Кэнники оскуоланы бүтэрэрбэр донор буоламмын хаан биэрбитим. Дьоҥҥо ыарахан түгэҥҥэ көмө наада буолбутугар туох да кэтэх санаата суох көмөлөспүтүм. Хааным төрдүс группалаах. Медицинэҕэ төрдүс группа дефицит группа диэн биллэр. Кэнники Россия Бочуоттаах донора буолбутум.

Ити курдук мин биэрбит ыйытыыбар олус дириҥ ис хоһоонноох хоруйу ыллым. Егор Афанасьевич Борисов оҕо сааһа, оскуолатааҕы сыллара барытыгар холобур буолар. Истиҥ кэпсээниҥ иһин Егор Афанасьевичка махтанабын.

Сандаара СЕМЕНОВА, VIII «Г» кылаас,

Дьокуускай куорат 17 №-дээх оскуолата