Үөһээ Бүлүү улууһугар үөрэххэ, успуорка, уопсастыбаннай үлэҕэ ситиһиилээх оҕолор баһылык Харыйатын тула муһуннулар. Ороһу орто оскуолатыттан 6 бастыҥ үөрэнээччи кыттыыны ылла.
Николай Крылатов 11 кылаас бастыҥ үөрэнээччитэ, кылаас ыстаарыстата, оскуолаҕа бэйэни салайыныы хамсааһын лиидэрэ.
Александр Потримай 10 кылаас үөрэнээччитэ. «Иннникигэ хардыы» научнай-практическай кэмпэриэнсийэ биология секциятыгар улууска 2 миэстэлээх.
Тохсус кылаастан 4 оҕо Харыйаҕа сырытта. Владислав Таныков оскуола бастыҥ спортсмена. Ол курдук улууска ыытыллыбыт хапсаҕайдаһан тустууга 2 миэстэ, көҥүл тустууга 1 миэстэни ылбыта. Антон Иванов улууска ыытыллыбыт биология олимпиадатыгар призёр, обществознание олимпиадатыгар ситиһиилээхтик кыттыбыта. Улууска «Төрүттэр суолларынан» научнай-практическай кэмпэриэнсийэ дипломана. Оскуолаҕа, кылааска ыытыллар тэрээһиннэр актыыбынай кыттыылааҕа. Ангелина Петрова оскуола бастыҥ үөрэнээччитэ, улууска ыытыллар предметнэй олимпиадаларга ситиһиилээхтик кыттар. «Бриллиантовые нотки» ырыа күрэҕэр 3 миэстэлээх, «Тулуйхан» оҕо ырыа ансаамбылын иитиллээччитэ. Сандаара Руфова үөрэх бастыҥа, улууска «Олоҥхоҕо ийэ уобараһа мин өйдөбүлбүнэн» уруһуй күрэҕэр 1 миэстэлээх. Иллэҥ кэмигэр уруһуйдуурун ордорор.
Сылын аайы ыытыллар баһылык Харыйатыгар кэлэр сылга оскуолаттан ситиһиилээх оҕолор элбээн, бара туралларыгар баҕарабыт.
«Тымтык» эдкорпост, Ороһу.