Үөһээ Бүлүү улууһугар Патриотизм сылын түмүктүүр «Сила в единстве: от прошлого к будущему» патриотическай форум ыытылынна.
Форумҥа элбэх үөрэнээччи, ыччат, үлэһиттэр, тэрилтэ салайааччылара кытыннылар. Биһиги, оҕолор, Анал байыаннай дьайыы кыттыылааҕа, Арассыыйа Дьоруойа Алексей Рафаэлович Петровы кытта көрсүһүүгэ сырыттыбыт. Кини «дойду көмүскэлигэр киһиэхэ күүстээх санааны, булгуруйбат күүһү-уоҕу төрөөбүт дойдуга таптал, ытыктабыл, бэриниилээх буолуу саҕар» диэн этиитин ыччакка тириэртэ. Форумҥа Ньурбаттан Арассыыйа Дьоруойа Андрей Николаевич Григорьев ыалдьыттаата. Кэлбит дьоҥҥо дойдуга куттал суоһуур кэмигэр күүстээх, тулуурдаах, түмсүүлээх буолуоххайыҥ диэн ыҥырда.
Ю.Н.Прокопьев аатынан спортивнай орто оскуола үөрэнээччитэ, Н.Бойлохов аатынан Оҕо искусствотын оскуолатын иитиллээччитэ Уйгулаана Эппэхова Геройу уруһуйдаабыт портрета истиҥ бэлэх, көрсүһүү өйдөбүнньүгэ буолла.
Форум түмүгүнэн, Үөһээ Бүлүү дьоно Саха Өрөспүүбүлүкэтин олохтоохторугар ыҥырыы таһаардылар:
- Дойдубут устуоруйабытын өйдүү-саныы, ытыктыы сылдьыахха. Ааспыты билии — сырдык кэскили тутууга акылаат. Өбүгэлэрбит хорсун быһыылара, кинилэр муударастара, өй-санаа туруга биһиги суолбутун сырдатыахтын.
- Ураты төрүт култуурабытын харыстыахха уонна сайыннарыахха! Тыл–өс, үгэс, сиэр-туом диэн биһиги кэлэр көлүөнэлэргэ тиэрдиэхтээх сыаната суох нэһилиэстибэбит.
- Биһиги уопсастыбабытыгар биир сомоҕолоһууну, сөбүлэһиини бөҕөргөтүөххэ! Бииргэ эрэ ханнык баҕарар ыарахаттары кыайар, саҥа үрдэллэри дабайар, сайдыыны ситиһэр кыахтаахпыт.
- Өрөспүүбүлүкэ олоҕор көхтөөхтүк кыттыахха! Саха сирин кэскилэ хас биирдиибититтэн тутулуктаах. Болҕомтолоох буолуҥ, норуот хаһаайыстыбатын экономикатын, үөрэҕириитин, культуратын, спордун, социальнай уонна да атын эйгэлэрин сайыннарыыга кылааккытын киллэриҥ.
- Улаатан эрэр көлүөнэни, ыччаты төрөөбүт дойдуну таптыырга иитиэххэ. Патриотизм диэн көннөрү тыл буолбатах, бэйэ сиригэр-уотугар күүстээх таптал, кини дьылҕатын иһин эппиэтинэс буолар.
Улуус олохтоохторун биир санааҕа түмпүт Патриотическай форум Ийэ дойдубутунан киэн туттууну, киниэхэ харыстабыллаах, ытыктабыллаах, бэриниилээх буолууну туоһулуур.
Сааскыйа Васильева, 10 кылаас, «Эрчим» медиакиин, Дүллүкү, Үөһээ Бүлүү