XXII «Манчаары оонньууларыгар» Ил Дархана Айсен Сергеевич Николаев анал ыҥырыытынан Кыргызстан өрөспүүбүлүкэтин миниистэрдэрин кабинетын бэрэссэдээтэлин солбуйааччыта Эдиль Жолдубаевич Байсалов ыалдьыттаата.
Ытык сиргэ Тааттаҕа «Дьулуруйар Ньургун Боотур» стадиоҥҥа тыл этэригэр Эдиль Байсалов Кыргызстан өрөспүүбүлүкэтин салалтатын аатыттан бырааттыы саха норуотугар ыҥырыыларын иһин дириҥ махталын тиэртэ.
– Бу күүс-күдэх, бырааттыы сыһыан улахан бырааһынньыгар – «Манчаары оонньууларыгар» кыттар үрдүк чиэскэ тиксэн турабыт. Биһиги делегациябыт бу ыраах сиргэ кэлэн туран, бэйэбитин чугас дьон курдук сананан сылдьабыт. Бырааттыы өрөспүүбүлүкэ истиҥ сыһыанын тутаргытын көрөммүт үөрэбит. Биһиги хаан ситиммит күүстээх цивилизация кэмигэр төрүт култуурабытын көмүскээн илдьэ сылдьар, – диэн бэлиэтээн эттэ.
Эдиль Жолдубаевич бу күн саха норуотун чулуу уола Максим Кирович Аммосов туһунан ахтан-санаан ааста: «100 сыл анараа өттүгэр коммунистическай диэйэтэл, бүтүн сойуус таһымнаах саха киһитэ РСФСР састаабыгар автономнай уобалас салайан, сэбиэскэй судаарыстыба тэриллиитигэр сүрүн оруолу оонньообута. Максим Кирович Аммосов салалтатынан бастакы республиканскай структуралар, былаас уорганнара уонна сүрүн тэрилтэлэр тэриллибиттэрэ. Кыргыз тылын уонна суругун сааһылааһын саҕаламмыта. Онно бастакы национальнай оскуолалар, медицинскэй куурустар уонна педагогическай дьиэлэр аһыллыбыттара. Биһиги норуоппут национальнай судаарыстыба тэриллиитин туһунан умнубат уонна хаһан да умнуо суоҕа. Бүгүн мин Максим Аммосовка сүгүрүйүүбүн махталбын этэбин. Бу үлэһит норуот историческай өйдөбүнньүгэ уонна инники сайдыыбыт мэктиэтэ».
Маны таһынан кини кыргыз уонна саха норуоттарын доҕордоһууларын бөҕөргөтүүгэ билиҥҥи кэмҥэ туох үлэ ыытылларын туһунан Таатта ытык сиригэр туран билиһиннэрдэ. Ол курдук сэбиэскэй Киргизия бастакы судаарыстыбаннай салайааччыта саха киһитэ Максим Кирович Аммосов буоларынан, кыргыз уонна саха доҕордоһуутун историятын бөҕөргөтүүгэ Арассыыйа икки региона хардарыта ситимнээхтик үлэлиир. Экономикаҕа, ыччат политикатыгар, спорт, үөрэхтээһин хайысхаларыгар түһэриллибит сөбүлэҥнэр олоххо киирэ тураллар.
– Саха сирэ — улуу Россия норуоттарын сэбэрэтигэр сыаналаах бэлэх. Норуот – аан дойдуга сүрүн сулус. Уларыйыы тыала элбэх норуоттары хаарыйар. Ол гынан баран биһиги бэйэ-бэйэбитин кытта истиҥ сыһыаннаах, бэйэбит тылбытын, култуурабытын билэр буоламмыт, ол барыта биһигини көмүскүүр. Бүгүн манна биһиги норуоппут былыргы үгэстэрин ытыктаан, кинилэр ситимнэригэр сүгүрүйэн туран, саха норуотугар махтанабын, – диэн Кыргызстан өрөспүүбүлүкэтин миниистэрдэрин кабинетын бэрэссэдээтэлин солбуйааччыта Эдиль Жолдубаевич Байсалов истиҥ санаатын тиэртэ.
Снежана ЯКОВЛЕВА, VIII кылаас, Майа, Мэҥэ Хаҥалас
«Кэскил» оҕо пресс-киинэ
Хаартыска Кыргызтан өрөспүүбүлүкэтин миниистирдэрин кабинетын
анал саайтыттан туһанылынна https://www.gov.kg/ru