Бэс ыйын 6-29 күннэригэр Эдьигээн орто оскуолатын иһинэн арыллыбыт «СЕРУН» (эбэҥкилии «Радуга») диэн лааҕыр уопсайа түөрт этэрээти арыйан үлэлээтэ. Олортон мин Дария Михайловна Андрющенко салайааччылаах «Эдэр оҕуруотчуттар» этэрээттэригэр сырыттым. Этэрээппитигэр барыта 22 оҕо баара. Күҥҥэ үстэ оройуон остолобуойугар араас битэмииннээх, иҥэмтиэлээх астары тото-хана сиэтибит.
Лааҕырбыт саҕаланыыта оскуола тэпилииссэтигэр помидор, оҕурсу, биэрэс, сибэкки арааһын олордубуппут. Ол кэннэ күн ахсын кѳрдүбүт-харайдыбыт: уу куттубут, сыыс оттоотубут. Оҕуруоппут аһа этэҥҥэ үүннэҕинэ, аны күһүн оскуолабыт остолобуойугар астына-дуоһуйа, киэн тутта сиэхпит диэн үѳрэбит.
Маны таһынан лааҕыр иһинэн буолар араас тэрээһиннэргэ кытынныбыт, сибиэһэй салгыҥҥа кѳччүйэ оонньоотубут, саҥа доҕоттордоннубут. Лааҕырга сылдьан олус астынным, элбэх саҥаны, биллим, үѳрдүм-кѳттүм. Эһиилги сылга эмиэ лааҕыр арыллыа диэн,эмиэ да долгуйа, эмиэ да сайыһа хааллым.
Дайаана Лукина,
Эдьигээн орто оскуолатын VII «А» кылаас.
Диана Антонова бэлэмнээтэ