Мин быйыл Эдьигээн орто оскуолатын иһинэн тэриллибит «Эколята-2022» сайыҥҥы оҕо сынньалаҥ лааҕырыгар сырыттым.
Биһиги экологическай лааҕырга сылдьан, айылҕаны хайдах харыстыыр туһунан элбэҕи биллибит. Иитээччилэр Ньургустана Ивановна уонна Нюргустана Сергеевна араас эмтээх от туһунан элбэҕи кэпсээбиттэрэ. Ньээм от сибэккитин хомуйан, ыраастаан, оргутан мүөт оҥорбуппут. Олус минньигэс, от амтаннаах мүөт сатаммыта. Кучу от (Иван-чай) сэбирдэҕин хомуйан, хатарбыппыт. Биир сиргэ олорбокко, хас күн аайы туһалаах дьыаланан дьарыктаммыппыт. Эдьигээммит тыата бөһүөлэктэн чугас буолан, сибиэһэй салгыҥҥа ардахтаах да күҥҥэ тыаҕа тахсарбытын олус сөбүлээбиппит. Лааҕыр оҕолоро бары биир да күнү көтүппэккэ бииргэ илии тутуспутунан сырыппыппыт.
Сорох күннэргэ улахан кылаас оҕолоро ыалдьыттыы кэлэн, маастар кылаастары көрдөрөөччүлэр. Ол курдук Инесса Максимова, 9-с кылаас үөрэнээччитэ, биһигини ПВА килиэйтэн слайм оҥорорго үөрэппитэ. 11-с кылаастан Аня Никифорова араас өҥнөөх саптарынан фенечка баайан көрдөрбүтэ.
Эдьигээн мусуойугар, бибилэтиэкэҕэ экскурсияҕа сылдьыбыппыт. Онно викторинаҕа кыттан, таабырын таайан, төрөөбүт дойдубут туһунан элбэҕи билбиппит. Өссө баһаарынай чааска сылдьан, араас техникалары көрбүппүт, формалара туохтан тигиллибитин, оҥоһуллубутун сөхпүппүт.
Лааҕыр хамандыырынан Вика Афанасьеваны талбыппытын сөп эбит дии санаатым, кини бары бииргэ сылдьарбытын ситистэ, эппиэтинэстээхтик салайда.
Ону кытта Өлүөнэ өрүскэ балыктаабыппыт. Алыһар балыгы тутан, аһаан, оонньоон кэлбиппит. Үчүгэй балыксыт аатын Родиман Алексеев, Петя Элляев, Саша Петров ылан, сүрдээхтик да үөрбүттэрэ.
Оройуон остолобуойугар биһигини хас күн аайы минньигэс астаах повардар көрсөр этилэр. Лааҕыр бүтүүтүгэр, бэс ыйын 29 күнүгэр, кыра кэнсиэр буолбута. Онно «Серун» оҕо сынньалаҥ киинэ «Эколята», «Эдэр оҕуруотчуттар», «Мэникчээннэр», «Дьулуур» сайыҥҥы оҕо лааҕырдара тугу оҥорбуттарын, ситиспиттэрин көрдөрбүттэрэ.
Ити курдук биһиэхэ умнуллубат сайыҥҥы күннэр аастылар.
Настя Егорова
Эдьигээн орто оскуолатын 8-с «а» кылаас үөрэнээччитэ,
«Эколята 2022» лааҕыр иитиллээччитэ
Бэлэмнээтэ Диана Антонова