Оскуолабытыгар «Классика Победы» диэн конкурс буолан ааста. Онно хас биирдии кылаас Аҕа дойду Улуу сэриитигэр сыһыаннаах сыаҥканы көрдөрдө.
Биһиги кылааспыт 11 кылааһы кытта холбоһон «Сарсыардааҥҥы саһарҕалар уу чуумпулар» диэн Борис Васильев айымньытыттан быьа тардыыны көрдөрбүппүт. Айымньыга биэс эдэркээн кыыс сэрии уоттаах кыргыһыытыгар бэйэлэрин олохторун толук уураллар. Рита Осянина диэн хамандьыыр кыыс оруолун учууталбыт Валентина Борисовна толордо, Женя Комелькова диэн, дьиэ кэргэнин ньиэмэстэр ытан өлөрбүттэрин иэстэһэр санаалаах, ол эрэн наар күлэ-үөрэ сылдьар кыыс оруолун Аммосова Оксана оонньоото, Соня Гурвич диэн Москва куоракка үөрэнэ сылдьан сэриигэ кэлбит кыыһы оонньоото Васильева Айыына, оттон мин Лиза Бричкина диэн лесхозка аҕатыгар көмөлөһөн үлэлээбит кыыс оруолун толорбутум, Галя Четвертак диэн детдомҥа улааппыт кыыс оруолун толордо Другина Ливия. Ону кытта, хамандьыыр Васков оруолун толордо Калинин Рустам. Рита Осянина уолун оруолун толордо Ефимов Алёша. Биһигини учууталларбыт Акулина Трофимовна Стручкова уонна Сардана Михайловна Горохова бэлэмнээтилэр.
Бэлэмнэнэр кэммитигэр көрүдьүөс да, ыарахан да түгэннэр бааллара. Көрүдьүөс түгэн диэн элбэх этэ. Ол курдук, бэрт үчүгэйдик оонньоон истэхпитинэ ким эрэ сыыһа саҥарыыта, эбэтэр этиэхтээх тылбытын атын интэнээссийэлээх саҥарыыбыт. Сороҕор ханна күлүөхтээх сирбитигэр аһары кыыһырбыт курдук туттабыт, оттон ханна саамай эппиэтинэстээх түгэҥҥэ эмискэ күлэн тоҕо барабыт. Бэлэмнэнэргэ ыарахана диэн дьоруойдарбыт ис туруктарыгар киирии буолар. Биһиги кинилэр хайдах сылдьыбыттарын, тугу санаабыттарын билбэт буоламмыт олус ыарахан этэ. Ону таһынан, мин дьоруойум Лиза уонна хамандьыыр бэйэ-бэйэлэригэр истиҥ сыһыаннаахтар, ону оонньуурга эмиэ ыарахаттардаах этэ.
Сэрии диэн олус ыарахан, онон сэрии кэмин көрдөрөр эмиэ уустук.Төһө да итинник уустуктары көрсүбүппүт иһин көрөөччүлэргэ ол эдэркээн кыргыттар ис туруктарын, уобарастарын сатаан тиэрдибиппит буолуо диэн эрэнэ саныыбын.
Мария МОРДОВСКАЯ,
X кылаас,
Боронук, Дьааҥы