Бэс ыйын 6-8 күннэригэр, ытык Кэбээйи нэһилиэгэр «ТАБЫС» Өрөспүүбүлүкэтээҕи эдэр ыччат култуураҕа уонна үөрэххэ бэстибээлэ буолан ааста.
Бу үс күн устата Кэбээйи нэһилиэгин дьоно-сэргэтэ олус сэргэхтик олордо. Сахабыт сиригэр маннык талааннаах, сайдыылаах, дойдуга бэриниилээх оҕолордоохпут диэн дьон-сэргэ астына бэлиэтээтилэр.
Бэс ыйын 8 күнүгэр, бэстибээл үөрүүлээх сабыллыытыгар СӨ-н эдэр ыччат политикатын миниистирэ Петр Шамаев, спорт миниистирэ Георгий Балакшин, Кэбээйи улууһун аҕа баһылыгын дуоһунаһын толорооччу Александр Сивцев эҕэрдэ тылларыттан уонна судаарыстыбаннай наҕараадалары, үрдүк ситиһиилээх ыччакка махтал суруктары туттарыыттан саҕаланна.
Маны таһынан, билигин анал байыаннай дьайыыларга сулууспалыы сылдьар Кэбээйи улууһун аҕа баһылыга Иван Левин видеонан бэйэтин эҕэрдэтин уонна ыччакка кэс тылын ыыппытын, бары сэргии көрдүлэр.
Уоспай түмүгүнэн хамаанданан киирсиигэ күөх Ньурба улууһа уонна «Zema» эрчимнээх эдэр ыччат түмсүүтэ кыайда.
Санатан этэр буоллахха, тэрээһиҥҥэ барыта 11 хамаанда кытынна. Барыта 6 күрэх ыытылынна. Сүрүн бирииһи — УАЗ массыынаны Ньурба хамаандата ылан, дойдуларыгар үөрүү-көтүү көтөллөөх тиийдилэр. Иккис миэстэ – Мэҥэ Хаҥалас улууһа, 200 тыһыынчанан, үһүс миэстэ – Чурапчы улууһа 100 тыһ. харчынан наҕараадаланнылар.
Олус көхтөөх, бэһиэлэй «Zema» хамаандаҕа 700 тыһ солк сертификат туттарылынна.
«Лидер молодежи» диэн ыччат бэлиитикэтэ хайдах былааннаахтык үлэлиирин көрдөрөр күрэххэ Горнай улууһуттан Сардана Максимова бастаата, иккис — Диана Павлова Чурапчыттан, үһүс — Анастасия Угарова, Дьокуускай куорат.
Алта этаптаах байыаннай эстафетаҕа Горнай улууһун Одуну хамаандата бастаата, иккис – Сунтаар улууһа, үһүс – Ньурба улууһа.
Фиджитал спорт диэн күрэххэ «Кэбээйи» эдэр ыччат түмсүүтэ бастаата, иккис — «Zema» эдэр ыччат түмсүүтэ, үһүс – Үөһээ Дьааҥы улууһа.
«Бастыҥ бөҕөскө» Кэбээйиттэн Яков Дмитриев бастаата. Иккискэ — Валентин Афанасьев Ньурбаттан (бирииһэ – мотоцикл), үһүс — Денис Колесов, Мэҥэ Хаҥалас улууһа (бирииһэ – мопед) буолла.
Ыраах хоту Дьааҥы улууһун «Дьааҥы ыччата» хамаандатын салайааччыта Дьулус Капитоновтыын кэпсэттибит: “Биһигини өрөспүүбүлүкэтээҕи эдэр ыччат «ТАБЫС-2024» фестивалыгар кэлбиппитигэр кэрэ Кэбээйи сиригэр үөрэ-көтө иһирэхтик көрүстүлэр, улуус туһунан билиһиннэрдилэр, Кэбээйи кэрэ сирдэрин көрдөрдулэр. Аатырбыт Турбаахы күөлгэ илдьэн сөтүөлээтибит! Улахан махталы тиэрдэбит 4 күн устата минньигэс, сылаас, хаһан да бүппэт аһынан күндүлээбит оскуола остолобуойун повардарыгар, үлэһиттэригэр! Дойдубутугар элбэх кэпсээн кэһиилээх, астык сонуннаах, үчүгэй ситиһиилээх тиийэрбититтэн олус астынабыт. Бука барыгытыгар доруобуйаны, таһаарыылаах үлэни, эйэлээх күөх халлааны, дьолу баҕарабыт. Өссө төгүл истиҥ махтал!»
Бэстибээл кыайыылаахтар үөрүүллээх парадтарынан түмүктэннэ уонна «ТАБЫС” бэстибээл гимнэ ылланна!
Маннык курдук олус сэргэхтик, күлэ-үөрэ кэпсэтэн Кэбээйи улууһа ыччаты кытта билсэн-көрсөн атаарыстыбыт, «Табыс» культурнай — үөрэтэр сыаллаах ыччат Өрөспүүбүлүкэтээҕи бэстибээл түмүктэммитинэн, эйэ — доҕордоһуу — сайдыы бырааһынньыга салҕана турарыгар, эдэр ыччакка ситиһиини, кыайыыны эрэ көтөллөөх сылдьалларыгар айхаллаатыбыт.
“Дьоҕур” медиакиин, Кэбээйи орто оскуолата.