«Эр санаа трассата» диэн ааттаммыт хас да биэрэстэлээх оскуола оҕолоругар уонна устудьуоннарга аналлаах санаа, тыын күүһүн көтөҕөр сүүрүү буолар. Бу тэрээһин саҕаланыытын 1998 сыллаахха Дьабыл нэһилиэккэ ылбыта. Бастакы тэрийээччитинэн Нестеров Андрей Андреевич буолбута.
Быйылгы тэрээһин сыала-соруга 1941-1945 сыллаах Аҕа дойду Улуу сэриитин кыттыылаахтарын, дьоруойдарын Советскай норуоту үйэтитии уонна саамай сүрүнэ — сүүрүүнү, доруобуйаны бөҕөргөтүү, спорду өрө тардыы буолар.
Сүүрбэ төрдүс төгүлүн ыытыллар тэрээһин бу 2022 сылга өссө биир олус улахан оруоллаах түгэҥҥэ — Саха АССР төрүттэммитэ 100 сылыгар ананар. Бу буолан ааспыт тугэннэр тыһыынчанан киһи олохторун уларыппыттара, онон бүгүҥҥү күҥҥэ диэри олус элбэх дьон санаатыгар, өйүгэр хаалаллар, күүстэрэ, сыаннастара уонна Аан дойду историятыгар оруоллара сыллар ааһалларын тухары улаатан, кэҥээн эрэ иһэллэр.
Онтон биһиги, Арассыыйа уонна Саха сирин эдэр дьоно, төрөөбүт дойдубутугар сыаналаах, наадалаах, уруккуга буолбут түгэннэри санаабытыгар үйэлэргэ хаалларыахтаахпыт, өйдүү сылдьыахтаахпыт, инники көлүөнэлэргэ суолталарын кыччаппакка тириэрдиэхтээхпит.
Бу манна олоҕурбут муус устар 6 күнугэр буолбут тэрээһин хас биирдии кыттааччыга, тэрийээччигэ уонна көрөөччүгэ дьоһун оруоллаах.
Ааспыт күҥҥэ аҕыс араас оскуолалартан уонна кулууптартан: военно-патриотическай «Факел», «Дохсун» кулууптар, транспортный техникум, Рассолода оскуолата, Шахурдин аатынан Төҥүлү оскуолата, Петров аатынан Дьабыл оскуолата, Попов аатынан Аллараа Бэстээх оскуолата, Аллараа Бэстээх бөһүөлэгин эдэр ыччата 100 уол уонна кыыс мунньустан, бэйэлэрин холоноорулар, Аллараа Бэстээх-Төхтүр-Бэдьимэ-Майа-Аллараа Бэстээх суолларынан уопсайа 100 км сүүрдүлэр. Хас биирдии туочукаҕа хорсун санаалаах спортсменнарбытын тэрийээччилэр, ыалдьыттар үөрүүлээхтик, бырааһынньык салгынын кытары көрүстүлэр, эҕэрдэлээтилэр, наадалаах, кытаанах тыллары эттилэр, инникигэ күүс-уох биэрдилэр.
Тулуурдаах буолуу — бу бириэмэҕэ олорор киһи дьиҥнээх туруга. Ардыгар, сорох түгэннэргэ биһиги тохтуохпутун баҕарабыт, олус үчүгэй дии, «бүтэрэн», тохтотон кэбиһэр. Ол эрээри, тулуурдаах эрэ киһи элбэҕи ситиһэр, олоххо баар куһаҕаттары, ыарахаттары кыайар.
«Эр санаа трассата» («Трасса мужества») оннукка үөрэтэр — сүүрүү кыттааччыларын тулуурдаах буоларга, туруоруммут сыаллары-соруктары дабайан ситэргэ. Ону таһынан сүүрүү оҕо доруобуйатын, өйүн-санаатын, күүһүн сайыннарар. Онтон быйыл бу тэрээһин кыттааччыларга патриотическай хаачыстыбалары, төрөөбүт дойдуга тапталы эмиэ иитэр.
Суруйдулар Нюргуяна МАКАРОВА, Айыына АЧИКАСОВА.