Олунньу 18 күнүгэр Тааттатааҕы норуот айымньытын дьиэтигэр тахсан эрэр эдэр талаан Алик Григорьев бастакы айар биэчэрин кэнсиэрэ буолан ааста.
Алик 17 саастаах, улуустааҕы «Үрдэл» биир сомоҕо оҕо хамсааһынын лидера, Тааттатааҕы «Сатабыл» оҕо айымньытын дьиэтин «Ситик» оҕо тэрилтэтин иитиллээчитэ, Ытык-Күөл 1 нүөмэрдээх оскуолатын үөрэнээччитэ.
Алик кыра эрдэҕиттэн ыллыыр, 13 сааһыттан ырыа, мелодия суруйар. Алик «ALIBRO» диэн сценическай аатынан тэҥҥэ үлэлэһэр үөлээннэхтэригэр биллэр.
Алик — ыал улахан оҕото буолан кыра балтыларын, быраатын көрөн-истэн ийэтигэр күүс-көмө буолар, дьиэ ис-тас үлэтин оҥорор эбээһинэстээх. Ону таһынан, ас астыырын, тыаҕа, айылҕаҕа сылдьарын олус сөбүлүүр.
Айар кэнсиэрин кэнниттэн Аликтыын кылгастык да буоллар кэпсэттибит, хас да ыйытыыларбытыгар эппиэттэри ыллыбыт:
— Айар биэчэрим мин санаабар олус үчүгэйдик, барыта былааннаммытын курдук ааста. Кэнсиэрбэр 5 табаарыстарым кыттыыны ылбыттара:
LLVTICE — Дьокуускайтан сылдьар эдэр ырыаһыт, продюсер, лейбл администратора;
Brain — Чурапчыттан сылдьар студент, убайым, ырыанан дьарыктаммыта 1 сыл буолла;
SHIGO — студент, 2020 сылга билсибиппит, иккиэн тэнинэн ырыа суруйабыт;
VAZO — Тыараһаттан сылдьар, кини гитаранан классическай ырыалары ыллыырын сөбүлүүр, быйыл кинини кытта ырыа суруйан киэн куйаарга таһаарбыппыт;
Saydam — Мындаҕаайыттан сылдьар, 2021 сылтан ыллыыр, сөп түбэсиһэн бииргэ ыллыыбыт, айабыт.
Инникибитигэр маннык састаабынан , саха сиригэр тур оҥороору былаанныыбыт, биһиги баҕа санаабыт эдэр ыччаты түмэ тардан, кинилэргэ саҥа арыйыылары бэлэхтиэхпитин баҕарабыт. Мин кэнсиэрим саҥа санаалары үөскэттэ: бары бииргэ тутуспутунан ырыаларбытын айан киэн куйаарга таһаарарга сыал сорук туруоруннубут.
Махтал тылларбын бастатан туран төрөппүттэрбэр аныыбын уонна миигин өйөөн кэлбит ырыаһыт табаарыстарбар, бииргэ түмсэн, дьарыктанар доҕотторбор Ситиктэрбэр, кэнсиэр тэрийэрбэр көмөлөспүт норуот айымньытын дьиэтин кэллэктиибигэр, кэнсиэрбин режиссёрдаан ыыппыт Алина, Антон Осиповтарга, салайаачыбар Матрена Дмитриевнаҕа. Баҕарабын барыларыгар доруобай, дьоллоох олоҕу!
Кэпсэттилэр «Сатабыл» медиа-студия кэрэспэдьиэннэрэ,
Тааттатааҕы «Сатабыл» оҕо айымньытын дьиэтэ.