Кулун тутар 28 күнүгэр П.А. Ойуунускай аатынан Саха академическай тыйаатырын лабораторнай саалатыгар эдэр суруйааччылар сүбэ мунньахтарын чэрчитинэн драма сценарийын суруйууга маастар-кылаас ыытылынна.
Маастар-кылаас санаа атастаһыытын быһыытынан олус истиҥник уонна сэргэхтик барда. Саха тыйаатырын сүрүн режиссера, СӨ искусствотын үтүөлээх деятелэ Руслан Тараховскай уонна Саха тыйаатырын литература чааһын сэбиэдиссэйэ Ангелла Попова саҥа саҕалыыр драматурдарга сценарийы суруйууга туох алҕастар тахсалларын, аныгы кэм геройун уобараһа хайдах буолуохтааҕын, режиссеру кытары драматург хайдах үлэлиэхтээҕин туһунан кэпсээтилэр.
Руслан Игоревич эдэр суруйааччылары тыйаатырга сыһыаран, кинилэр режиссердары, худуоһунньуктары кытта бодоруһан, хардарыта дьайсан үлэлээтэхтэринэ эрэ дьоһуннаах, сиппит-хоппут айымньы тахсарын тоһоҕолоон бэлиэтээтэ. «Иван Гоголев Федот Потаповтыын, Николай Лугинов, Баһылай Харысхал Андрей Борисовтыын ыкса алтыһан, чугастык тутуһан айбыттарыттан-туппуттарыттан саха норуота бүттүүнэ киэн туттар айымньылара тахсыбыттара. Ол ситим салҕаныахтаах», – диэтэ режиссер.
Тэрээһиҥҥэ сүрүн санаа быһыытынан суруйааччы тыйаатыры кытта эйгэлэһэн, биир санаанан салайтаран үлэлээтэҕинэ, драматург быһыытынан ситэн-хотон тахсара этилиннэ. Маныаха драматургия ирдэбиллэрин уонна сокуоннарын тутуһар, искусство эйгэтигэр уһуйуллар наадата болҕомтоҕо ылылынна. Холобур, Чехов МХАТ-ка, Островскай Малай театрга эбэтэр, Шекспир Глобус диэн Лондоннааҕы тыйаатырга уһуйуллубуттара ахтылынна.
«Эдэр суруйааччылар сүбэ мунньахтара туһалаах уонна интэриэһинэй тэрээһинтэн саҕаланна», – диэн тэрийээччилэр бэлиэтииллэр. «Олохпутун араас ньыманан дьүһүйэн суруйар дьоммут тыйаатыр алыптаах эйгэтигэр умсан, тыл-өс уонна өй-санаа туругар киирэн, айымньылаах үлэлэрэ өссө тэтимириэ, ис хоһооно өссө дириҥиэ», – диэн баҕа санаа этилиннэ
П.А. Ойуунускай аатынан
Саха академическай тыйаатырын
пресс-сулууспата.