Мэҥэ-Хаҥалас улууһун Хаптаҕай орто оскуолатын талааннаах үөрэнээччитэ Лида Иванова туһунан билиһиннэриэхпин баҕарабын.
Лида оскуолаҕа киириэҕиттэн наар туйгун сыанаҕа үөрэнэр, оскуола, кылаас общественнай олоҕор көхтөөхтүк кыттар. Лида саамай сөбүлүүр дьарыга — уруһуй.
Ийэтэ Анна Ивановна этэринэн, «Лида уруһуйга дьоҕура олох кыра эрдэҕиттэн биллибитэ». Анна Ивановна педагог иитээччи идэлээх буолан, оҕотун талаанын таба көрөн сөпкө салайан биэрбитэ. Ол курдук, кыыс художественнай кылааска үөрэнэ киирбитэ. Художественнай кылаас учуутала Виктория Викторовна Алексеева эмиэ бэйэтэ туспа көрүүлээх, талааннаах, улэҕэ бэриниилээх буолан, иитиллээччилэригэр элбэҕи биэрбитэ. Лида дьаныардаахтык, умсугутуулаахтых дьарыктанан, художественнай оскуоланы кыһыл дипломунан бүтэрбитэ.
Уруһуй оскуолатыгар ылбыт билиитэ, дьоҕура сылтан сыл арыллан, уруһуйдуур баҕата күүһүрэн, Лида бииртэн биир интэриэһинэй үлэлэри айар буолбута.
Уруһуйдьут киһи тулалыыр эйгэни, дьону атыннык көрөр дии саныыбын мин. Холобур, үгүс киһи ойууру-тыаны от күөҕэ дьүһүнүнэн көрөр, араас дэгэтин (оттенок) араарбат. Онтон Лида бэйэтэ этэринэн, өҥ арааһа олус элбэх, ону таба көрүөххэ наада. Кини бэйэтин кумирдарын сөбүлээн ойуулуур. «Мин ылабын да, көннөрү уруһуйдаан киирэн барабын. Ханнык эрэ методика, уруһуй техниката диэн сөп түбэһиннэрэ сатаабаппын. Уруһуйдуур баҕам атын худуоһунньуктар үлэлэрин көрдөхпүнэ эмиэ киирэр, кинилэр үлэлэрэ уруһуйдуурга, сайдарга олук буолаллар”, — диир.
Талаан киһиэхэ айылҕаттан бэриллэр, ону сайыннардахха эрэ талаан сайдар, үлэттэн дуоһуйууну ылаҕын. Лида дьоҕура төрүттэриттэн бэриллибит буолуон сөп. Ол курдук, аҕатын Иван Иванович бииргэ төрөөбүт эдьийэ Дария Ивановна сүрдээх дьоҕурдаах, иистэнэр, силинэн өрөр, анимацияны оҥорор, ыллыыр.
Лида үлэлэрин көрөн киһи сөҕөр: кини тус бэйэтин көрүүтүттэн, настарыйыанньаны биэрэриттэн, хамсаныыны таба оҥороруттан, сөпкө көрдөрөрүттэн …
Оскуолабыт бастыҥ үөрэнээччитэ Лида Иванова араас олимпиадалар кыайыылаахтара. Уруһуй күрэҕин араас таһымнаах куонкурустарын кыайыылаахтара, призера. 
Бүтүн Россиятааҕы «Твори открывай, действуй» куонкурус кыайыылааҕа, өрөспүүбүлүкэтээҕи оҕо айар үлэтин «Академия талантов» куонкуруһугар 2 степеннээх лауреат, норуодунай суруйааччыта Н.А. Лугинов 70 сааһыгар аналлаах уруһуй куонкуруһугар 1 миэстэлээх, о.д.а.
Мин суруйуубунааҕар Лида уруһуйдара элбэҕи кэпсиэхтэрэ, онон бу Лида уруһуйдарын сэргии көрүҥ. Оскуолабыт, нэһилиэкпит талааннаах оҕотугар үрдүктэн үрдүк ситиһиини, талаана сайдан үрдээн, салгыы үөрэнэн , бэйэтэ туспа көрүүлээх улахан худуоһунньук буоларыгар баҕарабын.
Ааптар: Нина Николаевна Яковлева, РФ уопсай үөрэхтээһинин бочуоттаах үлэһитэ, СӨ үөрэҕириитин туйгуна.
Мэҥэ Хаҥалас.