Уус Алданнааҕы социальнай-реабилитационнай кииҥҥэ Аҕа дойдуну көмүскээччилэр күннэригэр аналлаах «Эдэр хорсун саллааттар» диэн тэрээһин буолан ааста.
Иитиллээччилэр «Бравые солдаты» уонна «Морской отряд» диэн икки хамаандаҕа арахсан, «Орленок» байыаннай-патриотическай оонньууга күрэхтэстилэр. Бу оонньуу эт-хаан, өй-санаа өттүнэн бэлэмнээх буоларга иитэр-үөрэтэр. Курэхтэһиини сүрүн судьуйа В.П. Данилов салайан ыытта, мин киниэхэ көмөлөһөөччү буоллум.
Аан бастаан «Смотр песни и строя» түһүмэх буолбута. Манна оҕолор тэҥник кэккэлээн хаамыыны көрдөрдүлэр, хамандыыр хамаандатынан араас сорудахтары толордулар. Онтон «Боевая Слава» түһүмэххэ байыаннай бэлиэлэр ааттарын таайдылар, бары наһаа үчүгэйдик үөрэппиттэр эбит.
Салгыы геройдар ааттарын таайыыга бары эмиэ олус бэлэмнээхтэрин көрдөрдүлэр. Васильева Ангелина биир дойдулаахпыт, Россия Геройа М.М. Стрекаловскай, Аманатов Юра эмиэ биир дойдулаахпыт. Сэбиэскэй Сойуус Геройа В.Д. Лонгинов тустарынан кэрэхсэбиллээхтик кэпсээтилэр.
«Полоса препятствий» түһүмэххэ этэрээттэр бириэмэҕэ сүүрэн-көтөн, араас мэһэйдэри туорааһыҥҥа күрэхтэстилэр: түргэнник стройдаан туруу, сыыллыы, дулҕанан ойуу, бэрэбинэ устун сүүрүү, ууну туорааһын, өстөөҕү суох оҥоруу, тааҥканы таба быраҕыы.
Түмүккэ «Морской отряд» кыайыылааҕынан тахсыбыта. Кыттыбыт оҕолор грамота, торт, бириис ылан үөрбүттэрэ.
Василина Копырина, 15 саастаах
«Илдьит» эдкорпост.
Мүрү, Уус Алдан.