Ыам ыйын 5 күнүгэр, өрөбүл күн, Дьокуускай куоракка «Эдэр гвардия» диэн испэктээк көрдүм. Бу туруорууну Үүнэр көлүөнэ тыйаатырын сүрүн режиссера Александр Титигиров туруорбут. Кини Саха Өрөспүүбүлүкэтин ускуустубатын үтүөлээх диэйэтэлэ.
Оруоллары толордулар Мичил Хомпоев (Олег Кошевой), Владислав Портнягин (Иван Туркенич), Спартак Ларионов (Сергей Тюленин), Кирилл Рожин ( Жора Арутюнянц), Сергей Эверстов ( Сергей Левашов), Илья Яковлев (Женя), Ньургун Черов (Володя Осьмухин), Сахайаана Сидорова (Люся), Елизавета Далбараева (Нина), Любовь Макарова (Клава), Айталыына Яковлева (Любка Шевцова), Татьяна Хомподоева (Ульяна Громова), Айыына Слепцова (Валя Борц) уонна Анна Флегонтова (ийэ оруола).
Аан бастаан бу испэктээккэ мин сөбүлээн көрөр артыыстарым оонньуулларын көрө диэн барбытым. Үксүлэрин сахалыы сериаллартан көрөммүн билэр этим. Ити бастакытынан. Иккиһинэн, бу испэктээк дьиҥнээхтии олорон ааспыт оҕолор олохторун көрдөрөр эбит. Ону истэммин, көрүөхпүн-билиэхпин баҕарар санаам өссө күүҺүрбүтэ.
Ити курдук, «Эдэр гвардия» хомсомуоллар тэрээһиннэрэ эбит. Бу манна эдэр оҕолор киирэллэрэ. Аҕа дойду сэриитин кэмэ көрдөрүллэр. Фашистары утары охсуһууга аналлаах бөлөххө бу оҕолор бэйэлэрин баҕаларынан киирэннэр, элбэх хорсун быһыы оҥорбуттар. Бу илэ харахпынан ол хорсун быһыыларын көрдүм, биллим. Кинилэр Ийэ дойдуларын күүскэ таптыылларын көрдүм, хайдахтаах курдук тулуурдаахтарын биллим. Өстөөхтөн куттаммакка, күүстээх санаалаах буолан, бу биһиги көлүөнэҕэ диэри толук уурбуттар эбит.
Түмүктээн эттэххэ, «Эдэр гвардия» испиктээги биир тыынынан көрдүм. Олус сөбүлээтим. Бу маннык сүүрээҥҥэ майгынныыр, дойдуга бэриниилээх буолуу тыынын саҕар Юнармия диэн байыаннай-патриотическай хамсааһын баар. Биһиги 2023 сыллаахха кылааһынан бука бары киирбиппит. «Эдэр гвардия» эдэркээн оҕолорун курдук Ийэ дойдуну харыстааҥ, таптааҥ, бэриниилээх буолуҥ диэн сыаллаах-соруктаах буоларын өссө дириҥник өйдөөтүм диэххэ сөп.
Алгыстаана ЗАХАРОВА,
Дьокуускай куорат 25 №-дээх орто оскуолатын 7 кылааҺын үөрэнээччитэ.