Соторутааҕыта YouTube ханаалыгар саҥа биллэн эрэр дьикти дьарыктаах уол видеота баар буолбута. Кини аата — Протодьяконов Ариан. Кини Н.С. Степанов аатынан Бүлүү куоратын 3 №-дээх орто оскуолатын 8 кылааһыгар үөрэнэр. Иванна Слепцова, Н.И. Протопопова аатынан “Кэскил” киинин “Репортер” медиа–киинин эдэр кэрэспэдьиэнэ, билиһиннэрэр.
Ариан — олус сырдык, куруутун үөрэ–көтө уонна дьону үөрдэ–көтүтэ сылдьар, үтүө уонна амарах майгылаах уол. Ариан дьикти дьарыга – фокус! Ариан туһунан элбэх оҕо интэриэһиргиир, онон биһиги киниттэн бэйэтин туһунан кэпсииригэр көрдөстүбүт.
— Ариан, фокуһунан хаһааҥҥыттан дьарыктанаҕыный?
— Мин фокуһунан дьарыктаммытым 2 сыл буолла. Бастакы холонон көрүүбүн ийэбэр көрдөрбүтүм, онтон — бииргэ үөрэнэр оҕолорбор. Табыллар дии санаан, салгыы Инстаграмҥа таһаарар буолбутум.
— Фокустуурга ким үөрэттэ эбэтэр бэйэҥ үөрэнниҥ дуу?
— Фокустуурга мин бэйэм үөрэммитим. Аан бастаан Шин Лим диэн фокуснигы көрбүтүм, ол онтон саҕалаан барбытым. Шин Лям эмиэ бэйэтэ дьаныардаахтык дьарыктанан аан дойдуга биллэр фокусник буолбута.
— Инники туох былааннааххыный?
— Инники былааммар — Инстаграммын тупсарыы. Интернет ситиминэн араас сулустары, биллиилээх дьону кытта аһаҕас эфиргэ тахсыахпын баҕарабын. Сүрүн сыалбын, киэҥ сыанаҕа тахсыыны, ситиһэр санаалаахпын.
— Иллэҥ кэммэр тугунан дьарыктанаҕыный?
— Туруоруммут сыалбын ситиһээри, иллэҥ кэммэр фокуһунан эрэ үлүһүйэн дьарыктанабын.
Биһигини кытта бииргэ үөрэнэ, алтыһа сылдьар сэдэх, алыптаах дьарыктаах доҕорбутун саҥаттан саҥа фокустарынан сэргэхситэ турдун, сыалын ситистин диэн баҕарабыт!