«Саха тыла – кэм кэрэһитэ» диэн ааттаах эдэр экскурсоводтар күрэхтэрэ улууспутугар бастакытын телемост нөҥүө ыытылынна. Бу күрэҕи Уус Алдан култууратын салалтата уонна Сэһэн Ардьакыап аатынан Уус Алданнааҕы историяны уонна кыраайы үөрэтэр түмэлэ тэрийэн ыыттылар. Күрэх төрөөбүт дойду историятын үөрэтэр, чинчийэр, ийэ тыл күүһүн иҥэрэр, хас биирдии кыттааччы ситимнээхтик саҥарар-иҥэрэр,санаатын сайа этэр,тиэрдэр дьоҕурун сайыннарар сыаллаах ыытылынна. Күрэххэ уопсайа 10 оскуолаттан 32 үөрэнээччи кыттыыны ылла.
Музейнай педагогика – оскуолабыт биир үтүө үгэһинэн буолар. Энтузиаст учууталлар төрүттээбит музейдарын, салайбыт үлэлэрин салгыыр, сайыннарар эбээһинэстээхпит дии саныыбын.
Биһиги оскуолабыт оҕолоро бу күрэххэ олус ситиһиилээхтик кытыннылар, оскуолабыт музейдарын экспонаттарын, экспозицияларын сиһилии кэпсээн истээччилэргэ, дьүүллүүр сүбэҕэ билиһиннэрдилэр. Ол курдук, 2 кылаас үөрэнээччитэ Күннэй Бурнашева “Кыраайы үөрэтэр түмэлгэ анаан эдэр туристар 60-с слеттарыгар хомуллубут экспонаттар” кэпсээнинэн 3 миэстэни, 3 кылаастан Дамира Дорофеева “Космонавтика уонна авиация музейыгар нуучча улуу учуонайа К.Э.Циолковскай экспозицията” үлэтинэн “Сэргэх экскурсовод» анал ааты, 9 кылаас үөрэнээччилэрэ Динара Сивцева “Дүпсүн орто оскуолатын И.Н.Жирков аатынан истиэндэтин саҥалыы экспозицията” – 2 миэстэ, Вика Сивцева “Космонавтар аһылыктара.
Космонавтика уонна авиация түмэлин бастакы экспонаттара” 3 миэстэни (сал.Протопопова О.Ф.) уонна 10 кылаастан Күннэй Жиркова “Прибылыхтар аймах сэдэх экспонаттара – куортук» үлэтинэн “Кэрэхсэбиллээх кэпсээнньит” (сал.Федоров А.С.) анал ааты ылары ситистилэр. 2 кылаас үөрэнээччитэ Сандаара Лыткина (сал.Протопопова Р.П.) «Хос эһээм Ааллаах Үүн айанньыта. Музей матырыйааллара кэпсииллэр”, 3 кылаастан Сардаана Иванова “Советскай Сойуус Геройа В.Д.Лонгинов” (сал.Бурцева Л.П.), Нелли Бурнашева 4 кылаас “Дүпсүннээҕи кыраайы үөрэтэр музей сэдэх экспонаттара”, 7 кылаастан Анита Соловьева “Ини-бии Шелковниковтар тустарынан кыраайы үөрэтэр музей матырыйаалларынан”, 8 кылаастан Саша Ноговицына “Куйаар ситимэ уонна худуоһуннук Василий Ильич Фёдоров – Учур Уус. Сыаналаах экспонаттар”, Сардана Лыткина “Хоһуун Хотуоһап хомустара – кыраайы үөрэтэр түмэл сыаналаах экспонаттара”(сал.Протопопова О.Ф.) кэпсээннэрин сэргээн иһиттилэр.
Оскуола сааспытыттан музейбыт эйгэтигэр биһиги төрөөбүт дойдубутун, көлүөнэлэр ситимнэрин өйдүүр буоларга иитиллэн-үөрэнэн тахсарга дьулуһабыт.
Саша Ноговицына, 8 кылаас, Дүпсүн, Уус Алдан.