Тохсунньу 27 күнүгэр Е.Е. Эверстов аатынан Кэбээйи орто оскуолатыгар бэлиэ күн үүннэ. Бүгүн манна Кэбээйи улууһун араас муннугуттан спорду сэҥээрэр, дьаныһан туран дьарыктанар дуобатчыт оҕолор муһуннулар.
Бүгүҥҥү сүүмэрдиир күрэххэ Кэбээйи, Лүксүгүүн, Куокуй нэһилиэктэриттэн уопсайа 24 кыттааччы кэллэ. Бу күн түмүгүнэн кыайыылаахтар Дьокуускай куоракка республикатааҕы турнирга барар чиэскэ тиксиэхтэрэ.
Дуобат туһата элбэх, дуобатынан дьарыктанар оҕолор толкуйдуур дьоҕурдара сайдар, үөрэхтэригэр үчүгэй, билиигэ-көрүүгэ тардыһаллар, бэрээдэктээх, дьиссипилиинэлээх буолаллар, кыайыыга дьулуһаллар. Маны таһынан сөпкө ыраҥалыыр дьоҕуру иҥэрэргэ, туруоруммут сыалы ситиһэргэ, болҕомтону түмэргэ үөрэтэр.
Күрэх Кэбээйи нэһилиэгэр, улууһугар дуобат оонньуутун көҕүлээччи, тэрийээччи, үгүс оҕону республикатааҕы күрэхтэһиилэргэ кынат үүннэрбит, Кэбээйи орто оскуолатын физика учуутала Александр Степанович Заровняев көҕүлээн, Кэбээйи улууһун Үөрэҕириитин салаата өйөөн, ыытылынна.
Түмүккэ кыргыттарга 1 миэстэ — Кобякова Оля, 6 кылаас, Кэбээйи орто оскуолата;
2 миэстэ — Дьяконова Алгыстаана, 8 кылаас, Куокуй орто оскуолата
3 миэстэ — Каратаева Алина, 4 кылаас, Кэбээйи орто оскуолата.
Зачёту таһынан 2 миэстэ — Максимова Люба, 6 кылаас, Кэбээйи орто оскуолата.
Уолаттарга 1 миэстэ — Софронеев Влад, 6 кылаас, Кэбээйи орто оскуолата
2 миэстэ — Гаврильев Артур, 7 кылаас, Куокуй орто оскуолата
3 миэстэ — Спиридонов Вадим, 7 кылаас, Куокуй орто оскуолата.
Эдэр дуобатчыттарга инникитин даҕаны ситиһиилэри, кыайыыга дьулууру баҕарабыт!
“Дьоҕур” пресс-киин, Кэбээйи орто оскуолата.