Мин ис сүрэхпиттэн киэн туттан эбэм, сэрии сылын оҕотун туһунан кэпсиэхпин баҕарабын.
Эбэм Сидорова Елизавета Федотовна 1944 сыллаахха атырдьах ыйын 15 күнүгэр төрөөбүтэ. Эбэм дьонун туһунан кэпсииригэр олус долгуйбута. Ийэтэ Егорова Мавра Егоровна, аҕата Егоров Федот Иванович 8 оҕолоохторо, 7 уол уонна эбэм соҕотох кыра кыыс эбит. Аҕата продснабка таһаҕас таһарга үлэлээбит, сыарҕалаах атынан маҕаһыыҥҥа ас киллэрэрэ, таһаарара үһү.
— Атын бэйэтэ көрөр-харайар, аһатар этэ. Ийэм холкуос саҕана наар ынах быата хатарара, сылгы сиэлинэн тобугар ууран олорон, сиэлинэн бэйэтэ хатара, арыт мин көмөлөспүтэ буоларым да сылайарым. Куобах тириитин имитэн суорҕан тигэрэ, биһиэхэ ас астаан аһатара, үлүннэриилээх алаадьы, куобах, эт, тииҥ этинэн миин оҥоророн наһаа минньигэстик аһыырбын өйдүүбүн.
Аҕам уолаттарын кытта оттууллара, кыһын тыаҕа бултууллара. Оннук гынан, аҕам уолаттарын булчут гынан иитэн улаатыннарбыта. Олохторун тиһэх суолларыгар дылы кинилэр таҥастарын барытын ийэм хааччыйара, куобах тириитинэн үтүлүк, ынах, тайах, таба тыһынан, сарыытынан этэрбэс бэйэтэ тигэрэ. Кэлин кыра убайым Реворий Федотович сопхуос аһыллыбытыгар кырымахтаах хара саһылы аҕалан ииппиттэригэр аһатааччынан олоҕун тухары үлэлээбитэ, атын убайдарым инники утуу-субуу суох буолбуттара, соҕотох кыыс соҕотох хаалбытым. Аҕам инники суох буолбута, ийэм да кини кэнниттэн наһаа уһаабатаҕа. Бэйэм хаалан баран, ыал буолан олох олорон, дьиэлэнэн, күн бүгүҥҥэ дылы оҕолордоох, сиэннэрдээх, хос сиэннэрдээх толору дьоллоох олоробун.
Сэрии хаһан да буолбатын. Киһи олоҕун аймаабыт, оҕо саас диэни биллэрбэтэх алдьархайдаах сэрии умнуллубатын. “Өтөх төҥүргэстээх, сурт кэриэстээх” диэн өс хоһооно этэринии Ийэ дойдуларын көмүскээбит, олохторун толук уурбут аймах- билэ дьоммутун умнумуоҕуҥ. Итии, иһирэх тылынан ахта саныы сылдьыаҕыҥ.
Оҕолор, эбээлэрбит, эһээлэрбит олохторун үөрэтиэҕиҥ, үйэтитиэҕиҥ. Кинилэр ааттарын ааттата туруоҕуҥ.
Андрей Сидоров, VIII кылааc.
Томтор, Өймөкөөн.