Нэһилиэк дьаһалтата — нэһилиэк дьыалаларын салайыыга эппиэтинэстээх олохтоох салайыныы тэрилтэтэ буолар. Үлэтин эйгэтэ — нэһилиэнньэ олоҕун тупсарыы, сирин-уотун сайыннарыы, социальнай уонна экономическай сайдыытын боппуруостарын быһаарыы.
Биһиги, «Эрчим» медиа киин юнкордара Дүллүкү нэһилиэгин дьаһалтатыгар сүрүн специалист Нина Николаевна Ильинаны кытта нэһилиэнньэ олоҕун-дьаһаҕын, үлэтин-хамнаһын, инники соруктарын туһунан кэпсэттибит.
— Үтүө күнүнэн, Нина Николаевна! Дүллүкү нэһилиэгэр төһө киһи олороруй, быйыл эбиллии баар дуо?
— Дорооболоруҥ, оҕолор! Нэһилиэнньэбит ахсаана 1202 киһи. 65 элбэх оҕолоох ыал баар. Ол иһигэр биир 9 оҕолоох — икки 6 оҕолоох, уон икки 5 оҕолоох, уон алта 4 оҕолоох ыал олорор. Быйылгы дьылга аҕыс оҕо күн сирин көрдө: 6 уол, 2 кыыс.
— Нэһилиэкпит кыстыкка хайдах бэлэмнээх киирэн эрэрий? Быйыл сайын от былаана төһө туолла?
— Нэһилиэкпитигэр уопсай сүөһү ахсаана — 1229, онтон ыанньык ынаҕа — 440, сылгыбыт уопсай ахсаана — 842, ол иһигэр биэ — 525. Куурусса, куруолук иитэр ыаллар бааллар. Быйыл 4 ыйга 40 тонна үүт туттарылынна. От былаана 2530 тонна этэ, онтон 2390 т. оттонно. Онон былаан 94% туолан турар. Быйылгы кыстыгы туоруур от баар. Күһүмммүт уһаан, отчуттары абыраата.
Михаил Иванович Тарасов салайааччылаах ООО ЖКХ «Альтернатива» кыстыкка бэлэмнээх киирдэ. Нэһилиэкпит тэрилтэлэрэ уонна 60-тан тахса ыал киин ититиигэ холбонон олорор. Быйыл биир ыал эбии холбонно.
— Үлэнэн хааччыллыы хайдаҕый? Быйыл саҥа үлэһит кэллэ дуо?
— Билиҥҥи туругунан, тэрилтэлэрбит специалистарынан сүрүннээн хааччыллан олороллор. Врачебнай амбулаториябытыгар фельдшербит суох. Бу күннэргэ кэтэһэбит. Оскуолаҕа бэйэбит выпускникпыт Аркадий Григорьевич Лазарев Бүлүүтээҕи педколлеһы бүтэрэн кэлэн үлэтин саҕалаата.
-Эдэр ыал төһө олохсуйарый? Тутуу үлэтэ барар дуо?
— Дүллүкүгэ 18-гар диэри саастаах оҕолоох 179 ыал баар. Быйыл аҕыс дьиэ тутулла турар. Олортон үс ыал саҥа дьиэҕэ киириэхтээх.
— Анал байыаннай дьайыыга нэһилиэнньэ тугунан көмөлөһөрүй?
— Бу уустук кэмҥэ дойдубут туһугар ыраах сылдьар хоһуун уолаттарбытыгар сэтинньи ыйга улууспут дьаһалтатын делегацията барара былааннанар. Онно ыҥырыыны ылынан, » Күбэйэ» түмсүү уонна тэрилтэлэр, биирдиилээн дьон кытыантан маас оҥорон, ичигэс куллуку тигэн көхтөөхтүк кыттыһаллар. Тарасов М.И. дьыл бары кэмигэр олохтоохтору кыттыһыннаран балыктаан ыытар.
— Кэлэр сылга туох үлэ былааннанарый?
— 2026 сылга суол быраабылатын бэлиэлэрин уларытан туруоруохпут, уулусса уотун өрөмүөннээн саҥардыахпыт. Маны таһынан » Формирование городской комфортной среды» программанан Ийэ скверэ оҥоһуллан арыллыа. Анал байыаннай дьайыы кыттыылааҕа Степан Степанович Руфов аатынан уулусса суолун өрөмүөннүөхпүт. Онтон ППМИ программатынан ыытыллар үлэҕэ нэһилиэнньэттэн үс этии киирбитэ: сыбаалка сирин табыгастаах гына саҥардан оҥоруу, нэһилиэнньэҕэ өҥөнү оҥорор «ДТ-75» тыраахтары булуу, уонна «Кустук» оҕо уһуйааныгар оонньуур былаһаакканы ылыы. Бу үс этии үөрэтиллэр, ол кэннэ эмиэ мунньах тэрийэн куоластаан талыллыбыт программанан ППМИ-гэ киирсиэхпит.
— Нина Николаевна, сиһилии кэпсээниҥ иһин махтал!
Айыына Петрова, Александра Иванова, 9 кылаас үөрэнээччилэрэ, Дүллүкү орто оскуолата, Үөһээ Бүлүү