Покровскай куорат 1 №-дээх оскуолатын 2015 с. бүтэрбит Степан КИРИЛЛИН үөрэххэ туттарсар кэмигэр «ханна барабын, ким буолабын?» диэн ончу да долгуйбатах, уһун толкуйга түспэтэх.
Кыра сааһыттан асчыт буолар ыралаах уол потребкооперация үөрэҕэр, Дьокуускайдааҕы эргиэн кэллиэһигэр киирбит, ону бүтэрэн, билигин Санкт-Петербурга политехническай университекка үөрэнэр. Быйыл алтынньы ыйга Абу-Даби куоракка «WorldSkills» норуоттар икки ардыларынааҕы чемпионатыгар «Кондитерское дело» диэн компетенцияҕа үрдүк профессиональнай маастарыстыбатын көрдөрөн, медальон тутан, дойдутун, үөрэммит кыһатын дорҕоонноохтук ааттатта!
Дьоҕурдаах уол 2016 с. «Молодые профессионалы» диэн «WorldSkills» Национальнай чемпионатын түмүктүүр түһүмэҕин кыайыылааҕынан тахсан, Россия сүүмэрдэммит хамаандатыгар киирбитэ. Онно Степан 50 сантиметрдаах, сибэкки быһыылаах карамельнай минньигэһи оҥорбут. Ону биир волонтер алҕас хамсатан кэбиһэн, алдьаппытын, биһиги уолбут, өһүргэнэ, кыйахана, быһаарса барбакка, дьөрү биир холус тылы-өһү ыһыктыбакка, өссө тупсаҕай, өссө сиэдэрэй гына сорудаҕын бэрт чаҕылхайдык толорбут ээ!
Соторутааҕыта Степан Кириллин, Сахатын сиригэр кэлэ сылдьан, Аллараа Бэстээххэ, Дьокуускайга үөрэнээччилэри, устудьуоннары, суруналыыстары кытары көрүстэ, маастар-кылаастары ыытта.
– Оҕо эрдэхпиттэн эһэм бэрэскилэрин сиэн улааппытым, – диир Степан. – Баҕар, ол иһин буолуо, уруккуттан эр киһи дьахтардааҕар үчүгэйдик, минньигэстик астыыр диэн санаалаах этим. Ити санаам ончу да уларыйбат, аан дойду бастыҥ асчыттара – эр дьон. Алын кылаастан үлүһүйэн астыыбын. Бэйэм «мясо по-французски», үрүҥ сакалааты сөбүлүүбүн. Үөрэхпин бүтэрдэхпинэ, талбыт идэбинэн үлэлиэхпин баҕарабын. Санкт-Петербург – кондитерство сайдыбыт куората. Ол иһин онно үлэ көрдөнүөм. Онтон кэлин бэйэм чааһынай тэрилтэ тэринэн, баҕалаах дьону кондитер эйгэтигэр үөрэтиэхпин, уһуйуохпун баҕарабын. Биһиги үөрэхпит, идэбит алгебра, химия, биология предметтэрин үчүгэйдик билиини эрэйэр.
«WorldSkills» Саха сиринээҕи координационнай киинин салайааччыта Владислав Хабаров этэринэн, Степан инстаграмыгар аһылыкка, куукунаҕа эрэ сыһыаннаах бөлөхтөрү суруйтаран ааҕарын, араас маастар-кылаастары, сонун бүлүүдэлэри умсугуйан көрөрүн сөбүлүүр эбит. Онтон атыҥҥа асчыт кыһаллыбат, хаарыан кэмин онуоха анаабат, атаарбат эбит. Степан ити өрүтэ атыттарга эмиэ холобур буолуон сөп.
Эн, күндү ааҕааччы, туох үлүһүйүүлээххин? Ол туһугар тугу гынаҕын, инникитин тугунан дьарыктаныаххын баҕараҕын? Биһиэхэ суруй.
Жанна ЛЕОНТЬЕВА.
Ааптар түһэриитэ.