Хос эбэм Анна Дмитриевна Павлова Исидор Барахов аатынан совхоз Ороһу отделениетыгар ыанньыксытынан үлэлээбитэ. Кини бастыҥ үлэтин иһин «Үлэ Кыһыл Знамята» уордьанынан наҕараадаламмыта. Хос эһэм Владимир Максимович Павлов отделение туруу үлэһитинэн биллэрэ. Сылгы иитиитигэр үлэлээбитэ.
Эбэм Валентина Владимировна 30-тан тахса сыл олохтоох арыы собуотугар маастарынан, сэбиэдиссэйинэн үлэлээбитэ. Кини таптайан оҥорбут арыыта минньигэһинэн улууска биллэрэ. Билигин үлэлии турар арыы собуота кини аатын сүгэр. Мин ийэм Туйаара Ивановна, Валентина Владимировна кыыһа, ынах-сылгы иитэн, биһигини этинэн, үүтүнэн аһатар.
2001 сыллаахха бөдөҥ аграрник, Ороһу отделениетын өр сылларга салайан кэлбит Василий Поликарпович Егоров «Эһэ» бааһынай хаһаайыстыбаны тэрийбитэ. Бу хаһаайыстыбаны Павловтар уоллара, Эрик Владимирович, күн бүгүҥҥэ диэри тутан, салайан олорор. Хаһаайыстыбаҕа сүрүннээн оҕолоро үлэлииллэр.
Анна Дмитриевна эдэр эрдэҕиттэн ынахтарыттан үүт бөҕөнү ыабыт «Нэгэдьээк» сайылыгар Эрик Владимирович 40 ыанар ынаҕы сайылатан, күҥҥэ 270-300 киилэ үүтү ынахтарыттан ыан арыы собуотугар туттарар.
Билиҥҥи кэмҥэ кыстыыр отторун 60-тахса бырыһыанын оттоон чөкөттүлэр. Кинилэр балаҕан ыйын ортотугар дылы оттуур былааннаахтар, оччоҕо кыһыны кыһалҕата суох кыстыылларын этиннилэр. Ынах сүөһүттэн ураты сылгыны эмиэ иитэллэр. Кыһынын 2016 сыллаахха тутуллубут кыстык хотонноругар кыстыыллар.
Ынах үүтэ сэтинньи ыйтан аҕыйаан барарынан, кыһыҥҥы кэмҥэ үүт туттарыыта кыччыыр эбит. Сүрүннээн ынах төрөөһүнэ олунньу ыйтан саҕаланар, үүттэрин аҥарын ньирэйдэрэ иһэллэр, ордубутун туттараллар. Эт туттарыытынан дьарыгырбаттар.
«Эһэ» хаһаайыстыба таһынан, Ороһуга икки тэрээһиннээх хаһаайыстыба баар. Хаһаайыстыбаны эдэр дьонн Айсен Игоревич Тюляхов, Симон Егорович Быккасов тутан олороллор. Улуус үрдүнэн Ороһу нэһилиэгэ ынахтан элбэх үүтү ыан, арыы собуотугар туттарар.
Онон биһиги Ороһубутугар үүт-ас дэлэй.
Ванесса Васильева, салайааччы Н.Н. Михайлова,»Тымтык» эдкорпост, Ороһу.