Биһиги оскуолабыт хас үөрэх дьылын аайы оҕолору хамаандаҕа арааран, сыл устата спортивнай күрэхтэри тэрийэн ыытар үтүө үгэстээх.
Физкультура учууталлара М.В. Неустроева, А.С. Степанова, тренердэр А.И. Гаврильев А.И., Е.П. Захарова, А.Н. Тастыгин, А.С. Устинова, А.А. Ларионов үгүс спортивнай күрэхтэри тэрийэн ыытан оҕону эт-хаан өттүнэн сайыннараллара саарбаҕа суох.
Бу күннэргэ дуобакка, саахымакка күрэхтэһии буолла. Саахымакка 2 хамаанда Эльдар Уваров бастакы, 1 хамаанда Алеша Платонов иккис, 3 хамаанда Саян Левин үһүс миэстэ буоллулар.
Күрэххэ алын кылаас үөрэнээччилэрэ кыттыыны ыллылар. 1, 2, 3 миэстэлээх оҕолор улуустааҕы күрэххэ кыттыыны ылыахтара. Алын кылаастартан барыта 9 оҕо кытынна.
Саахымат уонна дуобат оҕону сайыннараллар. Өй-санаа өттүнэн сааһыланарыгар көмөлөөх. Саахымат уонна дуобат иккиэн кэккэлэһэ сылдьаллар, — диэн учууталбыт Елена Прокопьевна Захарова санаатын үллэһиннэ.
Оттон дуобакка биһиги эмиэ хамаанданан арахсан күрэхтэстибит. Ону кытта алын кылаас үөрэнээччилэрэ эмиэ көхтөөхтүк кытыннылар. Өссө «Чуораанчык» оҕо саадын иитиллээччитэ кэлэн кыттан, үһүс миэстэ буолан үөрэн-көтөн барда. Кини аата Костя Стручков, бэлэмнэнии бөлөх иитиллээччитэ. Алексей Ильич Гаврильевка дьарыктанар.
Дуобат күрэҕин түмүгүнэн 1 хамаанда бастакы, 3 хамаанда иккис, 2 хамаанда үһүс миэстэ буоллулар.
Түгэнинэн туһанан, тренербытыгар биһигини күрэхтэһиннэрбитигэр улахан махталы тиэрдиэхпин баҕарабын.
Күрэхтэһии туһунан бэйэбиттэн эбэн эттэхпинэ, элбэҕи биллим, оҕолор хайдах оонньуулларын көрөн үөрэнним.
Айна УСТИНОВА, VI кылаас,
В.М. Новиков-Күннүк Уурастыырап аатынан Эмис орто оскуолата, Амма