В.Н.Оконешников аатынан Павловскай орто оскуолатын базатыгар 2015 сыллаахтан хаһыйар секциятын МБУ ДО ДСЮШ салаатыттан үлэтин саҕалаабыт тренертан Николаев Дьулустаан Федоровичтын кытта эдэр кэрэспэдьиэннэр кэпсэттибит.
– Дьулустаан Федорович, үтүө күнүнэн! «Азия оҕолоругар» хас сыллаахха кыттыыны ылбыккытый?
– Yтүө күнүнэн! 2023 сыллаахха олунньу 23 күнүттэн, кулун тутар 5 күнүгэр дылы Кузбасска буолан ааспыт Норуоттар икки ардыларынааҕы “Азия оҕолорун” кыһыҥҥы 2-с Спортивнай оонньууларыгар биһиги Сахабыт сирин сборнай хамаандатыгар сүүмэрдэнэн киирэн мин икки үөрэнээччим ситиһиилээхтик кыттан кэлбиттэрэ. Уопсайа 11 көрүҥ баарыттан саха сирин хамаандата 7 көрүҥҥэ кыттыыны ылбыта. Саха сирин хамаандата уопсайа аҕыс мэтээллээх үөрэн-көтөн кэлбиттэрэ.
Лера Криговорницина 2017 сыллаахтан 5 кылааска үөрэнэ сылдьан миэхэ дьарыктана кэлбитэ. Лера оҕо эрдэҕиттэн төрөппүттэрин көрөн, үөрэнэн хайыһары тэбэн сөбүлүүр дьарык оҥостубута. Олус диэн кыһаллара, дьарыгы көтүппэт этэ. Хас биирдии дьарыкка эппиэтинэстээхтик сыһыаннаһара, үөрэ–көтө кэлэрэ. Биир сыл секцияҕа сылдьан баран 2018 сыллаахха Горнай улууһугар буолбут этап Кубка РС(Я) тиийэн бастакы мэтээлин ылбыта. Мантан эрэл ылан өссө дьаныардаахтык, тулуурдаахтык дьарыктанан, сборга сылдьан Лера республикаҕа лидер буолбута. Элбэх республика таһымнаах күрэхтэр кубоктарын хаһаайына буолар. Үчүгэй, үрдүк көрдөрүүлэрдээҕин иһин 2021 сыллаахха Алдан куоракка баар Училище Олимпийского Резерва оскуолатыгар үөрэнэ ыҥырыллар. Училещаҕа үөрэнэ киирэн баран өссө күүскэ дьарыктанан, соҕуруу сбордарга сылдьан, сайдан, таһыма улаатан саха сирин сборнай хамаандатыгар сүүмэрдэнэн киирэр. 2023 сыллаахха Норуоттар икки ардыларынааҕы “Азия оҕолорун” кыһыҥҥы 2-с Спортивнай оонньууларыгар кыттар чиэскэ тиксэр, онно тиийэн ситиһиилээхтик күрэхтэһэн сборнайга наадалаах баалы аҕалар. Билигин Лера ЯПК 1 куурсун ФО отделениятын устудьуона.
Иккис үөрэнээччибинэн Валя Егорова буолар. Валя хайыһар дьарыгар 2019 сыллаахха 6 кылааска үөрэнэ сылдьан кэлбитэ. Төрөппүттэрэ эмиэ олус кыһамньылаах, спорту өрө туппут дьиэ кэргэн буолаллар. Базовай упражнениялары билэр буолан хайыһар техникатын түргэнник ылыммыта. Дьарыгы көтүппэккэ, кыһамньылаахтык, дьулуһан туран дьарыктанара. Ситиһиилэрэ өр кэтэһиннэрбэккэ кэлбиттэрэ. Элбэх араас таһымнаах күрэхтэһиилэргэ сылдьан кыайыы үөрүүтүн билэрбит. Валя бастакы мэтээлин Дьокуускай куорат таһыгар баар Владимировка сиригэр ыытыллыбыт “Кросс лыжников” республиканскай күрэхтэһиигэ ылар чиэскэ тиксибитэ. Лералаах Валя төрөөбүт сыллара биир буолан күрэхтэргэ тэҥинэн сылдьаллара. Иккиэн куруук 1,2 миэстэҕэ тахсаллара. Бастакы сылларга Лера холку соҕустук кыайар буоллаҕына, ньоҕойдоһуу, дьарык күүһүнэн Валя киирсэр буолбута. Валяны үрдүк көрдөрүүлэрин иһин 2021 сыллаахха эмиэ Алдаҥҥа Училище Олимпийского Резерва ыҥыраллар. Билигин Валя Дьокуускай куоракка СУНЦ СВФУ 10 кылааһыгар ситиһиилээхтик үөрэнэ сылдьар.
2021 сыллаахха Лера уонна Валя сиэттиспитинэн өссө сайдар сыалтан Алдаҥҥа үөрэнэ бараллар. Кыргыттар сборга элбэхтэ сылдьыбыт буоланнар адаптацияны холкутук ааһаллар. Ханнык баҕар спорт көрүҥэ уустук түгэннэрдээх буолар. Хайыһар биир ыарахан спорт көрүҥэ. Спортсмен киһи саамай куттанар түбэлтэтэ эчэйии буолар. Маннык түгэн буолбатын туһугар сөптөөх дьарык, иҥэмтиэлээх ас, сөптөөх таҥас уонна халлаан туруга улахан тутулуктаахтар. Кыргыттар сөбүлүүр дьарыктарын төрөппүттэрэ өйдүүр, өйүүр буоланнар маннык ситиһиилэр кэлбиттэрэ. Соҕурууннан сборданан, саҥа дьылларын соҕуруу көрсөн 2023 сыллаахха Норуоттар икки ардыларынааҕы “Азия оҕолорун” кыһыҥҥы 2-с Спортивнай оонньууларыгар Сахабыт сирин сборнай хамаандатыгар сүүмэрдэнэн киирэн дойдуларын чиэһин ситиһиилэхтик көмүскээн наадалаах бааллары аҕалбыттара.
Быйыл 2024 сыллаахха олунньу-кулун тутар ыйдарга Саха сирин 5-ис кыһыҥҥы Спартакиадатыгар кыттыы ыллылар. Мэҥэ-Ханалас улууһун чиэһин көмүскээн ситиһиилээхтик күрэхтэстилэр. Лераҕа уонна Валяҕа хайыһарга маҥнайгы тренердара буоларбынан киэҥ туттабын! Кыргыттар үөрэхтэрин быыһыгар сөбүлүүр дьарыктарын илдьэ сылдьалларын астына, үөрэ көрөбүн. Лералаах Валяҕа баҕарабын үөрэхтэрин бүтэрэн, талбыт идэлэрин баһылаан, үчүгэй үлэһит дьон буолан тахсалларыгар.
В.Н.Оконешников аатынан Павловскай орто оскуолатын пресс-киинэ