Сэтинньи 18 күнүгэр биһиги оскуолабытыгар бэһис төгүлүн ыытыллар өбүгэ оонньууларыгар спорт бэстибээлэ буолан ааста. Манна Булгунньахтаах, 2-с Дьөппөн, Өктөм уонна Тумул оскуолалара, биһиги икки хамаандабыт кытыннылар.
«Дьулурҕан» диэн ааттаах саха национальнай оонньууларын күрэхтэһиитинэн буолар. Манна киирсэллэр: хаамыска, хабылык, кириэс тэбии, тутум эргиир, наарта нөҥүө ыстаныы уонна көтөх ынаҕы туруоруу. Бу күрэхтэһии биһиги оскуолабытыгар физкултуура, история уонна НВП учууталынан үлэлээбит Валентин Васильевич Павлов аатын сүгэр. Кини саха төрүт оонньууларын оҕолорго үөрэтэр, билиһиннэрэр, үгүс оҕону спорт, физкултуура эйгэтигэр сыһыарбыт киһинэн буолар.
Быйыл «Дьулурҕан» күрэхтэһиитигэр уопсайа 6 хамаандаттан муҥутуур кыайыылааҕынан 2-с Малдьаҕар оскуолатын бастакы хамаанадата буолла, иккис миэстэҕэ 2-c Дьөппөн, үһүс 2-с Малдьаҕар оскуолатын иккис хамаандата буолла. Биирдиилээн кыайыылаахтарга кыргыттарга Осипова Лиза (Улахан Аан) бастаата, иккис Захарова Александра (2-с Дьөппөн), үһүс Алексеева Альберта (Улахан Аан). Уолаттарга бастыҥ спортсменынан Голоков Никита буолла (Улахан Аан), иккис миэстэҕэ Гурьев Илья (Улахан Аан) таҕыста, үһүс Лебедев Вадим (2-с Дьөппөн) буолла.
Биирдиилээн көрүҥнэри кэпсиир буоллахха, эстафетаҕа 2-с Малдьаҕар бастакы хамаандата бастакы, 2-с Малдьаҕар оскуолатын иккис хамаандата иккис, үһүс миэстэҕэ 2-с Дьөппөн оскуолата.
“Көтөх ынаҕы туруоруу” көрүҥҥэ Гурьев Илья (Улахан Аан) көрдөрүүтэ 38, Лебедев Вадим — 35 (2 Дьөппөн), Голоков Никита — 32 (Улахан Аан). “Кириэс тэбии” көрүҥҥэ Осипова Лиза — 35 (Улахан Аан), Лебедева Оксана — 32 (2 Дьөппөн), Алексеева Альберта — 27 (Улахан Аан).
“Наарта нөҥүө ыстаныы” көрүҥҥэ Осипова Лиза — 120-тэ ойдо (Улахан Аан), Тимофеева Ариана — 104 (Улахан Аан), Захарова Александра — 97 (2 Дьөппөн). Уолаттарга Федоров Айхал — 138 (Булгунньахтаах), Гурьев Илья — 135 (Улахан Аан), Жуков Николай-118 (Өктөм).
“Тутум эргиир” көрүҥҥэ Захарова Александра — 63 эргийдэ (2 Дьөппөн), Осипова Лиза — 56 (Улахан Аан), Лебедева Оксана — 41 (2 Дьөппөн). Уолаттарга Голоков Никита — 39 (Улахан Аан), Борисов Эрчимэн — 38 (Улахан Аан), Лебедев Вадим — 34 (2 Дьөппөн).
Хабылык, хаамыска көрүҥэр Осипова Лиза (Улахан Аан) кыайыылаах буолла, иккис Алексеева Альберта (Улахан Аан), үһүс Захарова Александра (2 Дьөппөн). Уолаттарга Павлов Кирилл (Улахан Аан) кыайыылааҕынан ааттанна, иккис Гурьев Илья (Улахан Аан), үһүс Меняков Максим (Тумул).
Валентин Васильевич кэргэнэ Павлова Светлана Петровна уонна быраата Павлов Гаврил Егорович, Людмила Егоровна бу күн ыалдьыттаатылар: «Күрэхтэһиини олус сөбүлээтибит. Биһигини көрсөн, болҕомто уурбуттара олус долгутар. Физкультура учууталлара саха көрүҥнэригэр дьарыктыыллара хайҕаллаах. Валентин Васильевич олус үчүгэйдик физкултуура уруогун ыытар этэ, оҕолору уонна учууталлары кытта биир тылы холкутук булара, кинигэ ааҕарын сөбүлүүрэ, буочара үчүгэй буолара, билэрэ-көрөрө элбэҕэ, аймахтарын барыларын түмэрэ. Эр дьон учууталлар ол да кэмҥэ аҕыйах этилэр. Аймахтара, коллегалара кинини ытыктыыллара, ол да иһин буолуо бу күрэхтэһиини бэһис сылын ыыталлар. Оччолорго маннык сахалыы көрүҥнэринэн үлүһүйбэт этилэр, ол эрээри Валентин Васильевич сахалыы көрүҥнэри сөргүтүүнү саҕалаабыта дии саныыбыт».
Кыайыылаахтарга кубок, грамота, мэтээл, араас анал ааттар, сыаналаах бириистэр туттарыллыбыттара. Оҕолор астынан тарҕаспыттара.
Саха спордун төрүт көрүҥнэрэ умнуллубаттар.
Аман ЕРЕМЕЕВ, М.Е. Васильева аатынан 2-с Малдьаҕар оскуолатын
7 кылааһын үөрэнээччитэ.
Хаартыскаҕа түһэрдилэр: Алина ГРИГОРЬЕВА, 9 кылаас, Аман ЕРЕМЕЕВ.