Бу нэдиэлэни оскуолабытыгар патриотическай нэдиэлэнэн биллэрбиттэрэ. Ахсынньы 9 күнүгэр, Дьоруойдар күннэригэр, оскуолабытыгар дойдубут көмүскэлигэр, анал байыннай дьайыыга сырдык тыыннарын толук уурбут гвардия ефрейтора Павлов Василий уонна ефрейтор Осипов Ким ааттарын үйэтитэн «Дьоруой паартата» уонна бэлиэтэнньик истиэндэ арыйар тэрээһин буолла.
Тэрээһин оскуолабыт Росгвардия кылааһа строевой хаамыы көрдөрүүтүттэн саҕаламмыта. Ол кэннэ маҥнайгы кылаас оҕолорун Юнармия кэккэтигэр киллэрии сиэрэ-туома буолла. Буойуттарбыт ийэлэрэ, кэргэттэрэ, чугас дьоно, бииргэ үөрэммиттэрэ уонна үлэлээбит чугас доҕотторо кэлэн кытыннылар. Нэһилиэкпит аҕа баһылыга Каратаев Семен Самуилович, оскуола дириэктэрэ Нахов Георгий Иннокентьевич мустубут дьону эҕэрдэлээтилэр. Нам улууһун Көбөкөн нэһилиэгиттэн Ким Осипов доҕоро истиҥ тылларынан ахтыы оҥордо.
Оскуола түмэлигэр Ким Осиповка истиэндэ арылынна. Василий Павлов кэргэнэ бойобуой наҕараадаларын түмэлгэ туттарда. Оскуола иһинэн тэриллибит «Гармония» ырыа ансамбылыгар Ким Осипов аата иҥэрилиннэ. Бу өйдөбүнньүк паарталар, истиэндэлэр хорсун хоодуот уолаттарбытын оскуолабыт оҕолоругар куруук саната, үйэтитэ туруохтара. Кинилэринэн киэн туттабыт уонна эдэр көлүөнэ холобур оҥостобут.
Саяна Григорьева, X кылаас. Тааһаҕар, Бүлүү.