Аҕа Дойду Дьоруойдарын күнүгэр Т.М. Каженкин аатынан Арыылаах орто оскуолатыгар Дьоруой паартата арылынна. Тэрээһин Россия уонна Саха Сирин Судаарыстыбаннай былаахтарын киллэрииттэн, дойду уонна өрөспүүбүлүкэ гимнэриттэн саҕаланна.
Биһиги биир дойдулаахпыт, элбэх оҕолоох ыал улахан уола, бэйэтэ сэттэ оҕо амарах аҕата, икки бойобуой дьайыы кыттыылааҕа, «Эр санааланыы» уордьан кавалера, үгүс бойобуой мэтээл уонна наҕараада хаһаайына Иннокентий Иванович Барашков нэһилиэк дьонун үгүстэрин хаан-уруу аймахтара, чугас ыаллара, истиҥ доҕордоро этэ. Кини үс сыл анал байыаннай дьайыыга инники кирбиигэ сылдьан, быйыл ыам ыйыгар олоҕун толук уурбута.
Тэрээһиҥҥэ дьоруойбут ийэтэ, кэргэнэ, оҕолоро, кэллиэгэлэрэ, бойобуой доҕотторо, үөрэппит учуутала, нэһилиэк уонна оскуола дьаһалталара кытыннылар. Бары Иннокентий Иванович үтүө майгытын, оҕо эрдэҕиттэн көмүскэс, аһыныгас санаатын, дьонугар, дойдутугар тапталын, амарах сыһыанын тоҕоһолоон бэлиэтээтилэр.
Дьоруой паартата кини үөрэммит кэбиниэтигэр – саха тылын уонна литературатын кылааһыгар турда. Манна бастыҥтан-бастыҥ, үрдүк ситиһиилээх оҕолор олорон үөрэниэхтэрэ уонна бары да Дьоруой паартатын тула түмсүүлээх, дьулуурдаах, дьаныардаах буолан дьон бэрдэ буола улаатыахтара, киэн туттар көмүскээччибит аатын түһэн биэриэхтэрэ суоҕа диэн бигэ эрэллээхпит.
Т.М. Каженкин аатынан Арыылаах орто оскуолатын медиа-киинэ, Чурапчы улууһа.
keskil14.ru