Сэтинньи 15 күнүгэр миэхэ, тэрийээччи киһи быһыытынан, олус долгутуулаах этэ. Дьэ бу күн «Эрэл» оҕо хамсааһынын көҕүлээһининэн өр да өр туруоруллубут «Үөрэнээччилэр ситиһиилэрин айар быыстапкалара» кэнсиэрбит нэһилиэкпит Иннокентий Гурьевич Тимофеев-Теплоухов аатынан «Алаһа» норуот айымньытын дьиэтигэр буолан ааспыта.
Быйыл күһүн Владивосток куоракка «Океан» лааҕырга «Отличники Первых» сменаҕа сылдьан кэлбитим.
Бу сменаҕа тэрийэр, көҕүлүүр хаачыстыбабын ордук сайыннаран, улахан таһымнаах тэрээһини оҥорор санаа кэлбит буолуохтаах.
Кэлин, активистарбын кытта кэпсэтэн, сыл устата оскуолабыт оҕолорун ситиһиилэрин түмэр кэнсиэри оҥоруохпут.
Нэһилиэк олохтоохторун иннилэригэр туруорбут бастакы улахан кэнсиэрбитигэр оҕолор да, учууталлар да кыттыылаах 17 нүөмэри киллэрбиппит.
Бу тэрээһиҥҥэ мин сүрүннээн салайааччы, ону таһынан кыттааччы оруолун ылыммытым: сценарий суруйуута, хас биирди нүөмэри чопчу көрүү-истии, учууталлары кытта сүбэлэһэн үлэлэһии, ону тэҥэ 11 кылаас буоларым быһыытынан үөрэҕи туора уурбакка, олус күүскэ кыһаллыы.
Бу бэйэбэр туруорбут сорудахтарбын толорор ыарахан, сылаалаах этэ эрээри аттыбар чугас дьоннорум уонна наставниктарым баар буоланнар, боростуой оҕо ис санаата дьиҥнээх дьону үөрдэр кэнсиэр буолан таҕыста.
Кэлин, бэйэбэр икки санааны тоһоҕолоон иҥэрдим. Бастакынан, тэрийээччи, салайааччы буолар олус ыарахан, учууталга тэҥнээх үлэ эбит. Тоҕо диэтэр, чопчу салайааччы көрөрүттэн-истэриттэн, дьону түмэриттэн уонна үлэҕэ кыһалларыттан оҥорбут үлэтин түмүгэ көстөн кэлэр. Иккиһинэн, киһи төһө да кыһалыннын, төһө да үлэлээтин син биир соҕотоҕун тугу да кыайбат. Хайаан да салайар киһи таһыгар бииргэ ырытыһар, көмөлөһөр, чугас дьоно баар буолуохтаах. Оччоҕо эрэ үлэ таһымнаахтык тахсар. «Атас туһугар атах тостор» диэн мээнэҕэ эппэттэр.
Түмүгэр, киһи баҕардаҕына, туохтан да толлубакка, туруорбут сорудаҕар кыһаллыннаҕына уонна биллэн туран, аттыгар чугас, өйдүүр, өйүүр доҕотторо баар буоллахтарына, оннооҕор киһи ис санаатыгар кыайан дьаарыстаммат сорудахтар ситиһиилээх буолаллар диэн санааҕа кэллим.
Вадим КОЛЕСОВ, XI кылаас,
А.П.Илларионов аатынан Хайахсыт орто оскуолата, Чурапчы