Биһиги оскуолабыт 110 сыллаах историятын тухары Саха сирин, улуус, нэһилиэк сайдыытыгар киллэрбит кылаата олус улахан. 110 сыл аннараа өттүгэр үлэлээн-хамсаан ааспыт дьон нэһилиэккэ оскуола баар буоларын, оҕолоро үөрэхтээх дьон буола улаатан, олоҕу тупсаралларын туһугар кыһаллан да үлэлээбиттэр эбит!
Биһиги оскуолабыт 1915 сыллаахха арыллыбыта. Ол кэмтэн ыла сайдан, тупсан, билигин икки этээстээх таас оскуолаҕа үөрэнэбит. Билигин былыргы халыыптаах үөрэтии оннугар саҥа технологиялары киэҥник туттабыт, үөрэтэбит. Интерактивнай дуоскалар, компьютердар көмөлөрүнэн билиибит-көрүүбүт өссө кэҥиир. Араас хайысхалаах олимпиадаларга, күрэхтэргэ, научнай-чинчийэр үлэлэргэ кыттабыт. Научнай конференцияларга, информационнай технологияҕа, робототехникаҕа, уус-уран, айар-тутар күрэхтэргэ миэстэлэһэбит.
Оскуола дьон-сэргэ олоҕор чугас буоларга үөрэтэр. Араас социальнай бырайыактарга кыттабыт, нэһилиэк, улуус, куорат тэрээһиннэригэр, экологияны харыстыыр үлэлэргэ кыттыһабыт, ытык кырдьаҕастарбытыгар көмөлөһөбүт.
Бу барыта биһиэхэ общественнай эппиэтинэһи иҥэрэр.
Үбүлүөйдээх оскуолабыт инники былаана киэҥ. Оҕолор кыахтарын өссө арыйар, билиилэрин дириҥэтэр уонна олохпут устата үөрэнэр дьоҕурбутун сайыннарар соруктары туруорар.
Ахсынньы 6 күнүгэр буолан ааспыт оскуолабыт 110 сыллаах үбүлүөйдээх тэрээһинигэр бары өрө көтөҕүллэн кыттыыны ылан, сүргэбит көтөҕүллэн үөрэн-көтөн тарҕастыбыт. Өссө төгүл үбүлүөйгүнэн, тапталлаах оскуолам!
Алена НОЕВА, lX кылаас,
С.Д Флегонтов аатынан Хадаар орто оскуолата, Чурапчы