Бүгүн, ахсынньы 24 күнүгэр, СӨ Национальнай бибилэтиэкэтигэр РСФСР үөрэҕириитин туйгуна, СӨ үтүөлээх учуутала, педагогическай наука кандидата, «Гражданскай килбиэн» бэлиэ туһааннааҕа, Арассыыйа бочуоттаах попечителэ, Таатта улууһун уонна Тыараһа нэһилиэгин Бочуоттаах олохтооҕо, меценат, Учууталлар учууталлара, этнопедагог, «Эркээйи эргиирэ» бырагыраама ааптарскай бөлөҕүн кыттыылааҕа, «Арылы Кустук» СЭДИП технологиянан үлэлиир уһуйааннар ситимнэрин научнай салайааччыта, «Өксөкүлээх үөрэҕэ» бырагыраама ааптара, «Өксөкү сиэннэрэ», «Өксөкү сиэннэрэ. Чы-чып-чаап» бырагыраамалар научнай сүбэһитэ Екатерина Петровна Чехордуна 80 сааһыгар аналлаах «Дьоммун-сэргэбин кытта атах тэпсэн олорон…» үбүлүөйдээх дьоро күнэ буолан ааста.
Бүгүҥҥү бэлиэ күҥҥэ Екатерина Петровнаҕа махтал уонна эҕэрдэ тылларын этэ бииргэ төрөөбүт быраата, тэҥҥэ үлэлэспит дьоно, дьүөгэлэрэ, үөрэнээччилэрэ, биир дойдулаахтара кэллилэр.
Үөрүүлээх тэрээһиҥҥэ тылы бастакынан Екатерина Петровна бииргэ төрөөбүт быраата Петр Петрович ылла. Кини эҕэрдэлии кэлбит дьоҥҥо махтанна уонна дьиэ кэргэнин историятын туһунан кылгастык кэпсээтэ:
«Биһиги дьиҥнээх араспаанньабытынан Слепцовтарбыт. Кырдьаҕас Чөркөөххө бас-көс Слепцовтар диэн халыҥ аймахтар бааллар. Ол онтон сыдьааннаахпыт. Чехордун диэн араспаанньа хантан кэлбитий? Чохордо оҕонньор диэн баар үһү Тыараһа. Ол оҕонньор аҕабын сүрэхтииригэр Чехордун диэн араспаанньалаабыт. Онон биһиги Чехордуннарбыт. Чохордо диэн кыра чохороон сүгэ буоллаҕа дии.
Кини кэнниттэн эҕэдэлии Екатерина Петровна чугас дьүөгэлэрэ, Максимова Галина Семеновна уонна Игнатьевна Татьяна Алексеевна таҕыстылар:
«Катя миэхэ туох өйдөбүлү хаалларбыт диэтэххэ, кини куруук кинигэ доҕордоох буолара. Сытан эрэ кинигэ ааҕар этэ уонна саха литературатын сахалыы тылынан көрө тутар этэ. Ол саҕана биһиги саха литературата диэҥҥэ улаханнык болҕомто уурбат этибит. Катя ол саҕаттан киэҥ билиилээх, ырааҕы көрөр уонна кэпсиир этэ «мин аҕам олоҥхоһут» диэн. Ону биһиги туох эрэ ыраах, урукку үйэтинээҕи курдук саныыр этибит. Онтон билигин саамай суолталаах, саамай өйдөбүллээх биһиги Катябыт эбит».
Ол кэннэ Екатерина Петровна үөрэнээччилэрэ тахсан үөрэх кэмин санаатылар, араас түбэлтэлэри кэпсээтилэр:
«Мин Екатерина Петровнаны кытта 4 кылааска үөрэнэ сылдьан Чымынаайыга учууталлыы саха тылын үөрэтэ кэлбитигэр билсибитим. Биһиги мэник-тэник баҕайы оҕолор этибит. Ол эрээри Екатерина Петровна ыытар уруогар биһиги бары уу чуумпутук олорор этибит. Ким да айдаарбат да мэниктээбэт да этэ. Кини өссө фестивальга дирижердаан оскуола хорун ыллатар этэ. Ону илиитэ наһаа нарын намчы буолааччы».
«Екатерина Петровна биһиэхэ нуучча тылын уонна литературатын учууталынан үлэлээбитэ. Биһиги баппат кылаас этибит. 27 оҕо этибит. 6 дуу 7дуу кыыс уонна барыта оройдорунан көрбүт уолаттар. Кылаас салаайааччынан кинини анаатылар. Биһиги киниэхэ наһаа сыстыбыппыт, кини биһиэхэ эрэли үөскэппитэ. Мини изложение, мини сочинение, карточканан үлэни барытын-барытын сабыыс саҥа онно истэммит-көрөммүт, хаһан да аахпатахпытын ааҕан 8 кылааска нуучча тылын экзаменын бары 100% туттарбыппыт. Ити 30 билиэт миэхэ билигин да баар».
keskil14.ru