Кэнники кэмҥэ кырачааннар олоҥхолоон доллоһуталларын араас кэнсиэртэргэ, тэлэбиисэринэн биэриилэргэ астына көрөбүт. Биһиги нэһилиэкпит оҕолоро онтон эмиэ хаалсыбаттар.
Хаҥалас улууһун II Малдьаҕар М.Е. Васильева аатынан орто оскуолатын IV кылааһыгар үчүгэйдик үөрэнэр Дархан Тихонов үс сааһыттан сыанаҕа олоҥхолуу үөрэммит. Ол кэмҥэ уһуйааччыта Айна Михайловна Олесова кырачаан чобуо киһи хомоҕой тыллааҕын, ураты куоластааҕын, тыыппалааҕын бэлиэтии көрөн, тута дьарыктыырга санаммыт.
Уоннаах Дархан билигин хайыы-үйэ биэс олоҥхону эндэппэккэ билэр. Былырыын Алдан улууһугар ыытыллыбыт Олоҥхо ыһыаҕар «Кэскиллээх этээччи» үрдүк ааты ылбыта. Билигин «Бөртө Боотур» олоҥхо нууччалыы тылбааһын үөрэтэр.
Соторутааҕыта Хаҥалас улууһугар ыытыллыбыт «Хаҥалас Мини-мистерэ-2019» көрүү күрэххэ кыайыылаах аатын ылан, «Бриллиантовые нотки» куонкуруска олоҥхотунан кыттан, Гран-при хаһаайына буолбута. Онтон сылтаан уолбут сүргэтэ көтөҕүллэн, саҥаны билиэн-көрүөн баҕата өссө күүһүрбүккэ дылы.
Дархаҥҥа тыл өттүнэн дьоҕура эһэтиттэн, оһуохайдьыт, тойуксут Василий Николаевич Харитоновтан бэриллибит.
Биирдэ Дархан олоҥхолуу олордоҕуна, эһэтэ көрөн астыммыт уонна: «Оо, миигин утумнуур киһи көстүбүт эбит ээ», – диэн үөрбүт этэ. Кини эһэтин олоҥхотун тылларын үчүгэйдик өйдүүр буолан, аны билигин бэйэтэ өйүттэн оһуохай тылларын айар. Инники өттүгэр улахан ыһыахтарга оһуохай тылын этэр баҕалаах.
Кылааһыгар биир көхтөөх үөрэнээччи ордук математиканы, нуучча тылын сөбүлүүр. Дьөһөгөй оҕото уратытын, Харитоновтар төрүччүлэрин сыныйан үөрэтэн, дьоһуннаах дакылааттары суруйан, кэмпириэнсийэлэргэ кыттар.
– Кылааспыт уолаттара бары олоҥхолуубут. Үгүс куонкурустарга ситиһиилээхтик кыттабыт. Олоҥхо суолтатын, тылын-өһүн чиҥник үөрэттэххэ, сыанаҕа кыбыстыбакка кыттар буолаҕын. Ардыгар тойуктаан артыыстыыр кэмҥэр үөрэн-көтөн, ардыгар хомойон, кыыһыран, сороҕор дьээбэлэнэн да ыллаххына, араас уобарас өйгө киирэр.
Уопсайынан, хас биирдии уобараһы табатык арыйдаххына, көрөөччү тута кэрэхсиирэ, сэргиирэ, ытыс таһыныынан махталын тиэрдэрэ олус да үчүгэй! – диир Дархан.
ХААРТЫСКАЛАРГА: 1. 2. Кылааһын уолаттарыныын. 2.“Олоҥхо дойдутун оҕотобун-2019” өрөспүүбүлүкэтээҕи фестиваль “Кэскиллээх толорооччута” Дархан Тихонов.
Надежда ГРОМОВА.
II Малдьаҕар, Хаҥалас.