Үүнэр көлүөнэ тыйаатыра сындалҕаннаах уһун айантан эргилиннэ. Ол курдук, алтынньы 23-25 күннэригэр тыйаатыр «Дьол тааһа» диэн визитнэй карточката буолбут испэктээкилин Кытай өрөспүүбүлүкэтин Хэйлунцзянь провинциятын үс куоратыгар көрдөрдө. Цзямус, Фуцзинь, Фуюань куорат көрөөччүлэрэ хотугу номохторго олоҕурбут Александр Титигиров туруоруутун кэрэхсии, умсугуйа көрдүлэр.
«Быйыл Хэйлунцзянь уонна Саха өрөспүүбүлүкэтин Бырабыыталыстыбалара бииргэ үлэлэһиигэ сөбүлэҥҥэ илии баттаспыттара 20 сыла», диэтэ суруналыыстары кытары көрсүһүүгэ Зинаида Николаева, СӨ Тас дьыалаларга уонна норуоттар сыһыаннаһыыларыгар миниистири солбуйааччы.
—«Дьол тааһа»—биһиги тыйаатырбыт 17-с сылын көрдөрөр туруоруута. Туруорааччы-худуоһунньук—тыйаатыр сүрүн худуоһунньуга, СӨ култууратын туйгуна Прасковья Павлова. Россия араас куораттарыгар, итиэннэ омук дойдуларыгар араас фестивалларга ситиһиилээхтик көрдөрбүппүт. 2010 с. «Арлекин» диэн Россиятааҕы национальнай театральнай бириэмийэ «Лучшая работа режиссера» номинациятын кыайыылааҕа буолбуппутунан киэн туттабыт. Ханна баҕарар тылбааһа да суох оонньоотохпутуна, оҕолор өйдүүллэр. Холобур, Хорватияҕа норуоттар икки ардыларынааҕы фестивальга сырыттахпытына, оҕолор барытын өйдөөбүттэр этэ,— диэн сырдатта тыйаатыр сүрүн режиссера, СӨ искусстволарын үтүөлээх деятелэ Александр Титигиров.
—Тыйаатыр, сыана тыла диэн — өйдөнүмүтүө. Ханна да тыйаатыры өйдөөбөт көрөөччүнү өссө көрсө иликпин. Кытай эдэр көрөөччүтэ ахсаанынан элбэҕин да иһин, сүрдээх тэрээһиннээх, болҕомтолоох эбит. Бэл диэтэр, испэктээк кэмигэр хараҥа күүстүүн алтыһыахтаах сыанабар, бэйэлэрин тылларынан кытайдыы миэхэ куһаҕан тыынтан болҕомтолоох буоларбын, сэрэнэрбэр өйдөтөн биэрбиттэрэ. Оҕолор ханна да буоларыныы, олус сэргэхтэр, оонньуу бүппүтүн кэннэ илии баттаппыттара, хаартыскаҕа түспүттэрэ, онон хайдах эрэ бэйэбин ол түгэҥҥэ «K-pop» сулуһа курдук санаммытым, — диэн билинэр Хони оруолун оонньообут артыыс, СӨ култууратын туйгуна Илья Яковлев.
— «Дьол тааһын» кытай тылыгар тыйаатырбыт тас сыһыаннарга салаатын менеджерэ Мария Андреева тылбаастаата. Онтон сотору биһиги бэйэбит көрөөччүлэрбитигэр «Дьол тааһын» хайаан да көрдөрүөхпүт. Биһиги сырдык, төрөөбүт дойдуга тапталлаах, махталлаах сыһыаны иитиэхтиир испэктээкиллэри туруорар аналлаахпыт. Кытайга гастролбут дойдуларбыт ыккардыларыгар доҕордуу сыһыаны үөскэтиигэ далаһа буолбутугар саарбахтаабаппыт,—диир РФ култууратын үтүөлээх үлэһитэ, СӨ норуодунай артыыһа, РФ Бырабыыталыстыбатын Федор Волков аатынан бириэмийэтин лауреата Алексей Павлов.
Ахсынньы ыйга Үүнэр көлүөнэ тыйаатыра «Майаҕатта Бэрт Хара» испэктээкили сүрэхтиэҕэ. Билигин саҥа дьыллааҕы утренниктарга бэлэмнэнии үлэтэ саҕаламмыт.
Жанна Леонтьева.