2026 сыл тохсунньу 13 күнүгэр Дьокуускай куоракка «Инникигэ хардыы» үөрэнээччилэр научнай-практическай кэмпириэнсийэлэрин иккис күнэ ситиһиилээхтик ааста. Бу күн үөрэнээччилэр чинчийиилэрин көмүскээһиннэрин иккис түһүмэҕэ буолла. Нуучча филологиятын сиэксийэтигэр 47 кыттааччыттан маҥнайгы түһүмэҕи — стендэнэн көмүскээһини — ситиһиилээхтик ааспыт 24 оҕо салгыы киирдэ. Иккис күн Үөрэх сүрүн корпуһун кэрэ саалатыгар ыытылынна.
Тэрээһин сарсыарда 10:00 чаастан саҕаланан, күнүс 16:00 чааска диэри буолла. Бу кэм устата үөрэнээччилэр бэйэлэрин чинчийэр үлэлэрин дьүүллүүр сүбэҕэ билиһиннэрдилэр. Нуучча филологиятын сиэксийэтигэр олус кэрэхсэбиллээх үлэлэри болҕойон көрдүбүт. Ол курдук:
- «Саха телевидениетыгар реклама тылын уратылара»: тыл үөрэҕин аныгы сайдыытын уонна маассабай информация ситимин ырытыы.
- «Аат ис хоһоонун кистэлэҥэ»: киһи аатаноруот култууратыгар уонна өйүгэр дьайыытын чинчийии.
- «Саха Есенина: айар үлэтин уратылара»: нуучча классическай литературатын сахалыы айымньылары кытта ситимнээн дьүһүйүү.
- «Оҥоһуу өй (искусственнай интеллект) литератураҕа: буорту дуу, туһа дуу?»: аныгы технологиялар литератураҕа дьайыыларын ырытыы.
Маннык үлэлэр нуучча тыла уонна литературата билигин да сайда турар билим эйгэтэ буоларын көрдөрдүлэр.
Иккис түһүмэххэ бэлэмнэнии уонна үлэни иһитиннэрии үөрэнээччилэртэн улахан эппиэтинэһи ирдээтэ. Оҕолор научнай литератураны дириҥник үөрэтэн, тиэкистэри ырытан, чинчийэн, бэйэлэрин түмүктэрин чопчулаан этэргэ үөрэннилэр. Хас биирдии кыттааччыга дакылаатын билиһиннэрэн баран, экспертнэй хамыыһыйа ыйытыыларыгар хоруйдаата, ону таһынан, бэйэтигэр туһалаах сүбэлэри ылла.
Бу курдук кэмпириэнсийэлэргэ кыттыы үөрэнээччилэргэ олус улахан туһаны аҕалар. Ол курдук, чинчийэр дьоҕуру, ырыҥалыыр өйү, дьон иннигэр тыл этэр уонна бэйэ санаатын итэҕэтиилээхтик көмүскүүр сатабылы сайыннарар. Ону таһынан, оскуола оҕолорун инники идэлэрин таба талалларыгар көмөлөһөр, үөрэнээччи билим сорҕото буоларыгар олук уурар.
Регламены чопчу тутуһуу, волонтердар уонна экспертэр ситимнээх үлэлэрэ, ону таһынан Үөрэх сүрүн корпуһун кэрэ саалата табыгастаах буолан, тэрээһин иккис күн ситиһиилээхтик ааста.
Түмүккэ биир кыттааччы кыайыылаах (лауреат) үрдүк аатын, 10 үөрэнээччи диплому тутан, чинчийбит үлэлэрэ үрдүктүк сыаналанан бары да үөрэн-көтөн тарҕастылар. Маны таһынан, хас да кыттааччы өссө да атын кэмпириэнсийэлэргэ салгыы кыттарга мэктиэлэннилэр.
Айыына Степанова, IX кылаас,
И.Г. Тимофеев аатынан Майа лиссиэйэ.
keskil14.ru